ރައީސް ޑރ މުހައްމަދު މުއިއްޒުގެ ދަރިފަސްކޮޅަށްވެސް ދިވެހި ރައްޔިތުން މައާފް ނުކުރާނެ ކަމަށް ރާއްޖޭގެ ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ޑރ ޖަމީލް އެކްސްގައި ކުރެެއްވި ޕޯސްޓެއްގައި ވިދާޅުވީ ވެރިކަމުގެ ދައުރު ނިމުމުން މުއިއްޒުވެސް ވާނީ އާންމު ރައްޔިތަކަށް ކަމަށާއި އެހެންކަމުން ރައްޔިތުންގެ އިހުސާސްތައް އައްސަވާ ބޮޑާނުވުމަށެވެ.

މީޑިއާތަކުގެ މިނިވަންކަމަށް ހަނިވާ ގޮތަށް އަންގާރަ ދުވަހު ފާސްކުރެވުނު ބިލާއި ގުޅިގެން ޑރ. ޖަމީލް ވިދާޅުވީ މި ބިލުގެ ސަބަބުން މިނިވަންކަން ގެއްލެނީ ހަމައެކަނީ މީޑިއާތަކާއި ނޫސްވެރިންނަށް ނޫން ކަމަށާއި މުޅި ދިވެހި ރައްޔިތުންގެ ޚިޔާލުފާޅު ކުރުމުގެ މިނިވަންކަމަށް މިއިން އަސަރު ކުރާ ކަމަށެވެ.

މީގެ އިތުރުން، ދިވެހި ރައްޔިތުންގެ ފައިސާއިން ބޮޑު މުސާރަ ނަންގަވައިގެން ދިވެހިންނަށް ނިކަމެތިކަން ލިބޭ ފަދަ ބިލުތައް ފާސްކޮށް ރައްޔިތުންގެ ނިކަމެތިކަން ހާމަކޮށް ބޮޑާ ނުވުމަށްވެސް ޑރ ޖަމީލް ވަނީ ރައީސް މުއިއްޒަށް ނަސޭހަތްތެރިވެފައެވެ.