މީޑިއާތަކުގެ މިނިވަންކަން ހަނިވާ ގޮތަށް ރައްޔިތުންގެ މަޖިލީހުގެ 60 މެންބަރުންގެ ސޮއި އެކު ފާސްކުރި ބިލު ރައީސް މުއިއްޒު ތަސްދީގުކުރެއްވުމާއި ގުޅިގެން ރާއްޖޭގައި މީޑިއާތަކުގެ މިނިވަންކަން ނަގާލާފައިވާ ކަމުގެ ޚަބަރުތައް ބައިނަލްއަގްވާމީ އެކި މީޑިއާ ޕްލެޓްފޯމްތަކުގައި ރިޕޯޓްކޮށްފިއެވެ.
މި ބިލު ފާސްކުރުމާއި ގުޅިގެން އެމެރިކާގެ އެމްބަސީއިންވެސް ވަނީ ޚިޔާލުފާޅުކުރުމުގެ މިނިވަންކަމަށް ހުރަސްނޭޅުމަށް ދިވެހި ސަރުކާރަށް ގޮވާލާފައެވެ.
މީގެ އިތުރުން، "ނެކްސް ނޭޝަން ޓު ފޯލް" ގެ ގޮތުގައި ބައިނަލްއަގްވާމީ މީޑިއާތަކުގައި ދިވެހިރާއްޖެ އަންނަނީ ސިފަކުރަމުންނެވެ.
މުޅި މި ބިލުގެ ރޫހު ހުރީ މިނިވަން މީޑިއާ ނެތިކޮށްލުމަށް އަދި ސޯޝަލް މީޑިއާ އާއި އިންޓަނެޓު ކޮންޓްރޯލް ކުރަން ކަމަށްވާތީ، އެ ބިލު ވަގުތުން ބޭރު ކުރަން ވަރަށް ގިނަ ނޫސްވެރިންނާއި ބޭރުގެ ޖަމިއްޔާތަކުން ވަނީ ސަރުކާރަށް ގޮވާލާ ބޮޑެތި ފާޑުކިޔުންތައް އަމާޒުކޮށްފައެވެ.
އަދި ބިލާ ދެކޮޅަށް ޝުއޫރު ފާޅު ކުރުމަށް ނޫސްވެރިން ދަނީ ސިލްސިލާ މުޒާހަރާތަކެއް ބާއްވަމުންނެވެ.
ދިވެހިރާއްޖެއަކީ ޚިޔާލުފާޅުކުރުމުގެ މިނިވަންކަމަށް އަބަދުވެސް ލޯބި ކުރަމުން އައި ގައުމަކަށްވާއިރު، ސިޔާސީ ބޭނުންތަކަށް ދިވެހިރައްޔިތުންގެ ދޫ ބަންދުކުރުމަށް ސަރުކާރުން އަވަސްއަރުވާލައިގެން ނިންމެވި ނިންމެވުމާއި ދެކޮޅަށް ނޫސްވެރިންގެ އިތުރުން އާންމުންވެސް އަންނަނީ ފާޑުކިޔަމުންނެވެ.
