ބަޖެޓް ހޭދަކުރާގޮތް ހާމަކުރުމަކީ ގާނޫނު ލާޒިމުކުރާ ކަމެއް ކަމުގައި ރައީސް އަބްދުﷲ ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ޑރ ޖަމީލް އެކްސްގައި މިއަދު ކުރެއްވި ޕޯސްޓެއްގައި ވިދާޅުވެފައިވަނީ ޑިމޮކްރެސީއެއް އޮންނަ ތަނެއްގައި ރައްޔިތުންގެ ފައިސާއަށް މާލީ ކަންތައްތަކާއި ބެހޭ ވުޒާރާއިން ނުވަތަ ސަރުކާރުން ޖަވާބުދާރީވާން ޖެހޭނެ ކަމަށާއި މިއީ ރައްޔިތުން ޕްރެޝަރ ކޮށްގެން އާންމުކުރަން ޖެހޭ މައުލޫމާތު ނޫން ކަމަށެވެ.

ދިވެހި ރައްޔިތުންގެ މުސާރަ ތައްޔާރުކޮށް ދެނީ ފައިނޭންސް އިން ކަމަށްވާއިރު މުސާރައަކީ އެ މިނިސްޓްރީން ލިޔެގެން ވަކިން ބަލަހައްޓާ މައުލޫމާތު ނޫން ކަމަށް ބުނެ ނިންމާނުލެވޭނެ ކަމަށް ޖަމީލް ފާހަގަކުރެއްވިއެވެ.

މީގެ އިތުރުން، ސަރުކާރުން މުސާރައަށް ހޭދަކުރާ މިންވަރު "ސާބިތުކޮށްގެން" ނޫސްވެރިން އާންމުންނާއި ހަމައަށް ގެނެސްދެވޭނީ ކިހިނެތްތޯ ޖަމީލް ވަނީ ސުވާލު އުފައްދާފައެވެ.

މިދިޔަ ހަފްތާ ބްރާސްފަތި ދުވަހު ރައީސް ތަސްދީގުކުރެއްވި މީޑިއަ ބިލާއި ގުޅިގެން ނޫސްވެރިން އާންމުކުރާ އަދަދުގެ އެންމެ އަކުރެއް މަދުވިޔަސް ނުވަތަ އިތުރުވިޔަސް ފިޔަވަޅު އެޅިގެންދާނެ ކަމަށާއި ރައްޔިތުންގެ ފައިސާއަށް ވާނުވާ އެންގުމަކީ ސަރުކާރުގެ ޒިންމާއެއް ކަމަށް ޖަމީލް ވަނީ ގޮވާލާފައެވެ.

މިފަދަ ކަންތައްތަކަކީ ޚުދުމުހުތާރު ވެރިން ވެރިކަމުގައި ތިބޭތީ ފެންނަ މަންޒަރުތައް ކަމުގައިވެސް ޖަމީލް ވަނީ މި ޕޯސްޓްގައި ސިފަކޮށްފައެވެ.

މިއާއިއެކު ސިޔާސީ މަގާމުތަކުގައި ތިބި މީހުންގެ އަދަދަކީ 992 ކަމަށް މިދިޔަ ޖުލައި މަހުގެ 15 ވަނަ ދުވަހު ސަރުކާރުން އާންމުކޮށްފައިވާއިރު މި ބޭފުޅުންނަށްވެސް ސަރުކާރުން ހޭދަވާ މިންވަރެއް ސާފެއްނުވެއެވެ.