ފާނަބަސަންދު (ޗިކެންޕޮކްސް) ފެތުރޭތީ އެ ބަލިން ރައްކާތެރިވުމަށް، ހެލްތު ޕްރޮޓެކަޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭ އިން "އެކްސް"ގައި ކުރި ޕޯސްޓެއްގައި ވަނީ ފާނަބަސްދުގެ ވޭދަނަތައް އިތުރުވާތީ ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތައް އާންމުންނަށް ކިޔައިދީފައެވެ.
ވައިރަހަކުން ޖެހޭ މި ބަލި މި ބަލި އާންމުކޮށް ކުޑަކުދިންނަށް ޖެހުނު ނަމަވެސް ބޮޑެތި މީހުންނަށް ވެސް ޖެހޭނެކަމަށް އެ އެޖެންސީން ވަނީ ހާމަކޮށްފައެވެ.
މި ބަލީގެ އަލާމަތްތަކުގެ ތެރޭގައި ހުން އައުން، ވަރުދެރަވުން، ނޭފަތުން ފެން އައުން އަދި ހަމުގައި ފެންއަރާފައި ހުންނަ ބިހިތަކެއް ނެގުން ހިމެނެއެވެ.
އެޗްޕީއޭއިން ބުނި ގޮތުގައި، މި ބައްޔަކީ ގައިން ގަޔަށް އަރާ ބައްޔަކަށްވާއިރު ބަލިޖެހިފައިވާ މީހެއް ކެއްސާ، ކިނބިހި އަޅާއިރު ނޭވާލާ ނިޒާމުން ވެސް މި ބަލި ފެތުރެއެވެ.
ބިހި ނަގާފައި ހުރި މީހެއް ގައިގައި ބީހުމުން ނުވަތަ ބަލި ޖެހިފައިވާ މީހަކު ބޭނުންކޮށްފައިވާ ތުވާލި ފަދަ ތަކެތި ބޭނުންކުރުމަކީ މި ބަލި ޖެހުމުގެ ފުރުސަތު ބޮޑުވާނެ ކަމެއް ކަމަށްވެސް އެ އެޖެންސީން ބުނެފައިވެއެވެ.
އަދި ގައިގައި ހުރި ބިހިތައް އެއްކޮށް ކުރަމަގާލިލަންދެން މި ބަލި ފެތުރުމުގެ ފުރުސަތު އޮންނާނެ ކަމަށްވެސް އެޗްޕީއޭން ވަނީ ބުނެފައެވެ.
ބަލި ޖެހިއްޖެނަމަ ގޭގައި އުޅޭ އެހެން މީހުންނާ އެކަހެރިވުމަށާއި ގެއިން ބޭރަށް ނުދިޔުމަށާއި ޗިކެންޕޮކްސް ވެކްސިން ނުޖަހާނަމަ އެ ވެކްސިން ޖެހުމަށް އެޗްޕީއޭއިން ވަނީ އެދިފައެވެ. އަދި ބަލި ޖެހޭ މީހުން ހިފައި ގެންގުޅޭ ތަކެތި ވެސް އެކަހެރިކުރުމަށް އެދުނެވެ.
ކުރިން ފާނަބަސަންދު ނުޖެހޭ ކޮންމެ މީހަކީ އެ ބަލި ޖެހުމުގެ ފުރުސަތު އޮންނާނެ މީހެކެވެ. އެކަމަކު، ކުރިން އެއްފަހަރު ވެސް އެ ބަލި ޖެހިފައިވާ ނަމަ ދެވަނަ ފަރަހަށް ބަލި ޖެހުމުގެ ފުރުސަތު ވަރަށް ކުޑަވާނެކަމަށްވެސް އެޗްޕީއޭން ހާމަކޮށްފަެއިވެއެވެ.
