ރައީސް ޑރ މުހައްމަދު މުއިއްޒުގެ ސަރުކާރުން މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ބޭނުން ކުރަނީ ކިރުފެލަން ކަމަށް ވިދާޅުވެ އެމްއޭސީއެލްއާ ކުންފުނީގެ މެންޑޭޓުގައި ނުހިމެނޭ ކަންކަން ހަވާލުކުރާތީ ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލުގެ ފާޑުކިޔުން އަމާޒުކުރައްވައިފިއެވެ.

ރަށް ރަށުގެ އެއާޕޯޓު އެޅުމަށް ރައީސް މުއިއްޒު އެމްއޭސީއެލްއާ ހަވާލުކުރަމުން ގެންދާދިއުމަށް ފާޑުވިދާޅުވެ މަލީހު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ފަތުރުވެރިކަމުގެ ކާމިޔާބީއަކީ އެ ސިނާއަތު ސިޔާސީ ނުކޮށް ދޫކޮށްފަ އޮތުން ކަމަށާ އެއަރޕޯޓް ކޮމްޕެނީ، އެމްއޭސީއެލް މިހާތަނަށް ހިންގަމުން އައީ ޕްރޮފެޝަނަލްކޮށް ކަމަށެވެ. ނަމަވެސް ރައީސް މުއިއްޒުގެ ސަރުކާރުން އެކުންފުނި ސިޔާސީ ބޭނުމަށް މަންފާ ހޯދަމުން ދާ ކަމަށް ވިދާޅުވާ މޭރުމަކުން މަލީހު ވިދާޅުވެފައިވަނީ، ރައީސް މުއިއްޒު ސަރުކާރުން އެމްއޭސީއެލް ބޭނުން ކުރަނީ ކިރު ފެލަން ކަމަށެވެ. އަދި އެކަންކަން އެގޮތަށް ކުރައްވާ ރައީސް މުއިއްޒު ގެންދަވަނީ އެއްވެސް ޒިންމާދާރުކަމެއް ނެތި ފައިސާ އިސްރާފުކުރަމުން ކަމަށްވެސް މަލީހު ވިދާޅުވެފައިވެއެވެ.

މަލީހު ކުރެއްވި އިތުރު ޕޯސްޓެއްގައި ވިދާޅުވެފައިވަނީ، އެމްއޭސީއެލްއަކީ އެއާޕޯޓް ހިންގާ ކުންފުންޏެއް ކަމަށާ އެއީ އެއާޕޯޓް އަޅާ ކުންފުންޏެއް ނޫން ކަމަށެވެ. ރައީސް މުއިއްޒަކީ ޖޯކު ސޮރެއްގެ ގޮތުގައި ސިފަކުރައްވާ މަލީހު ވިދާޅުވެފައިވަނީ، އެމްއޭސީއެލްގައި އެއާޕޯޓު އެޅުމުގެ ޤާބިލުކަމެއް ނުހުންނާނެ ކަމަށެވެ. އެކުންފުނިން ކުރާނެ ހާ ވެސް ކަމަކީ ކޮންމެވެސް ބަޔަކަށް ސަބްކޮންޓްރެކްޓް ކުރުންކމަށް ވިދާޅުވެ މަލީހު ވިދާޅުވީ އެއީ ރައީސް މުއިއްޒުގެ ސަރުކާރުން ފައިސާ ކާން ޖަހާ މަޅި އެއް ކަމަށެވެ.

މަލީހު މިފަދައިން ވިދާޅުވެފައިވާއިރު، ރައީސް މުއިއްޒު މިވަގުތު އަތޮޅު ތެރެއަށް ކުރައްވަމުން ގެންދަވާ ދަތުރުފުޅުގައި ގިނަ ރަށްތަކެއް އެއާޕޯޓު އެޅުމަށާ ބަނދަރު ހެދުމަށް އެމްއޭސީއެލްއާ އަދި އެމްޓީސީސީއާ ވެސް ހަވާލުކުރަމުން ގެންދާކަން ފާހަގަކޮށްލެވެއެވެ.