ރައީސް ޑރ. މުހައްމަދު މުއިއްޒު ގެ ކެބިނެޓަށް ރުހުން ދިނުމާ މެދު ގޮތެއް ނިންމަން ރައްޔިތުންގެ މަޖިލީހުގައި ޖެނުއަރީ 28 ވަނަ ދުވަހު ބޭއްވި ޖަލްސާ ކުރިއަށް ދިޔަ ވަގުތު މަޖިލީހުގެ ބޭރުގައި ކުރި މުޒާހަރާގެ ތެރެއިން މަޖިލިސް ކުރާގޭ ގޯތި ތެރެއަށް އުކީ ގާ ނޫން ކަމަށާއި ކުކުޅު ބިސް ކަމަށް ސިފައިންނާއި ފުލުހުން ބުނެފި އެވެ.

ރައީސް މުއިއްޒުގެ ކެބިނެޓުގައި ހިމެނިވަޑައިގަންނަވާ ވަޒީރުންނަށް ރުހުން ދިނުމާ މެދު ގޮތެއް ނިންމަން ފުރަތަމަ ބޭއްވި ޖަލްސާ ކުރިއަށް ދިޔަ އިރު މަޖިލީހުގެ ބޭރުގައި މުޒާހަރާކުރީ ސަރުކާރުގެ އިސް ބޭފުޅުންނާއި ސަރުކާރުގެ ސަޕޯޓަރުންނެވެ.

ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ބޭއްވި ބައްދަލުވުމުގައި ކޮމިޝަނާ އޮފް ޕޮލިސް އަލީ ޝުޖާއު ވިދާޅުވި ގޮތުގައި އެ ދުވަހުގެ މުޒާހަރާގައި ގޭންގްތަކުންވެސް ވަނީ ބައިވެރިވެފައެވެ.

އެ ދުވަހު މުޒާހަރާކުރި މީހުންގެ ތެރެއިން ބަޔަކު މަޖިލީހުގެ ގޭގެ ބޭރު ފާރުމަތިން އަރައި ގޯތި ތެރެއަށް އެއްޗިހި އުކި ކަަަމަށް ބުނާ މައްސަލަ ބަލަން އެ ކޮމިޓީގެ މިއަދުގެ ބައްދަލުވުމަށް ޑިފެންސް މިނިސްޓަރު މުހައްމަދު ޤައްސާން މައުމޫނާއި ޕޮލިސް ކަމިޝަނަރު އަދި ސިފައިންނާއިި ފުލުހުންގެ އިސް ބޭފުޅުން ހާޒިރުކޮށްފައިވެއެވެ.

އެ ބައްދަލުވުމުގައި މިނިސްޓަރު ގައްސާން ވިދާޅުވީ މުޒާހަރާ ކުރި ދުވަހު މަޖިލީހުގެ ގޯތި ތެރެއަށް އެ ދުވަހު އުކާފައި ހުރީ ކުކުޅު ބިސް ކަމަށާއި މަޖިލީހުގެ އިންފާރު ހުރި ގޮތުން ސަލާމަތީ ކަންތައްތައް ބަލަހައްޓަން އުނދަގޫވާކަން އެމްއެންޑީއެފުން 2021 ވަނަ އަހަރު މަޖިލީހަށް އަންގާފައިވާ ކަމަށެެވެ.

މެމްބަރުންގެ ސަލާމަތާ ރައްކާތެރިކަމަށް ނުރައްކަލެއް މެދުވެރިވާ ފަދަ ހާލަތެއްް މެދުވެރިވައި ނުވާ ކަމަށް ވެސް ގައްސާން ފާހަގަކުރެއްވިއެވެ.

ކަމިޝަނާ އޮފް ޕޮލިސް އަލީ ޝުޖާއު ވެސް ވިދާޅުވީ މަޖިލީހުގެ ގޯތިތެރެއަށް އެ ދުވަހު، ކުކުޅުބިސް ފިޔަވައި އެހެން އެއްޗެއް އުކާފައި ނުވާ ކަމަށެވެ. ނަމަވެސް ކުކުޅުބިސް އުކީ ކޮންބައެއްކަން ދެނެގަނެވިފައިވާ ކަމަށާއި އެ މައްސަލަ މިހާރު ތަހުގީގުކުރަމުން އަންނަ ކަމަށް ވެސް އޭނާ ވިދާޅުވި އެވެ.