ރައީސް މުއިއްޒުގެ ސަރުކާރުން މީޑިއާ ކޮންޓްރޯލް ގާނޫނު ފާސްކޮށްފައިވާތީ މިނިވަން ނޫސްވެރިކަން ނެގެހެއްޓުމަށް ކެނެޑާއިން ދިވެހި ސަރުކާރަށް ގޮވާލައިފި އެވެ.

ކެނެޑާއިން މިފަދައިން ގޮވާލީ ސްރީ ލަންކާގައި ހުންނަ ކެނެޑާގެ ހައި ކޮމިޝަނުން ކޮށްފައިވާ އެކްސް ޕޯސްޓެއްގައެވެ. އެ ގައުމުން ރާއްޖެއަށް ކަނޑައަޅާފައި ހުންނަ ނޮން ރެސިޑެންޝަލް ސަފީރަކީ ސްރީ ލަންކާއަށް ވެސް ކަނޑައަޅާފައި ހުންނަ ސަފީރެވެ.

މީޑިއާ ކޮންޓްރޯލް ގާނޫނާއި އެކު މިނިވަން ނޫސްވެރިކަމަށް ފުރުސަތު ދިނުމުގެ މުހިންމުކޮށް ތަކުރާރުކޮށް ފާހަގަކޮށް ހަނދުމަކޮށްދޭ ކަމަށް ކެނެޑާގެ ހައި ކޮމިޝަނުން ބުނެފައިވެ އެވެ. އަދި ދެ ގައުމުން އެއްބަސްވާ ކޮމަންވެލްތު ޗާޓަރުގައި ހިމެނޭ ހައްގުތައް ނެގެހެއްޓުމަށް ގޮވާލާ ކަމަށް ވެސް ބުނެފައިވެ އެވެ.

މީޑިއާ ކޮންޓްރޯލް ގާނޫނަކީ ރާއްޖެއިން ސޮއިކޮށްފައިވާ ބައިނަލްއަގުވާމީ މުއާހަދާތަކާ ހިލާފު ގާނޫނެއް ކަމަށް ވިދާޅުވެ އެ ގާނޫނު އަނބުރާ ގެންދިޔުމަށް ދިވެހި ސަރުކާރަށް އދ. ގެ ހައި ކޮމިޝަނާ ފޯ ހިއުމަން ރައިޓްސް ވޮލްކާ ޓާކްއާއި އެމެރިކާއިންވެސް ވަނީ ގޮވާލައްވައިފަ އެވެ.

މީގެ އިތުރުން، އދ. ގެ އިތުރުން ޔޫރަޕިއަން ޔޫނިއަން، އަދި އިނގިރޭސިވިލާތުން ވެސް ވަނީ އެ ގާނޫނާ މެދު ކަންބޮޑުވުން ފާޅުކޮށްފަ އެވެ. އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ)، ރިޕޯޓާސް ވިތައުޓް ބޯޑާސް (އާރުއެސްއެފް)، އަދި، ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ވެސް މި ގާނޫނު އުވާލަން ގޮވާލާފަ އެވެ.

މި ބަޔާންތަކަށް ރައްދު ދެއްވައި މުއިއްޒު ވަނީ، ބޭރުގެ ފަރާތްތަކުން ފާޅުކުރަމުންދާ ކަންބޮޑުވުންތަކަށް ނުބައްލަވާނެ ކަމަށް ވިދާޅުވެފަ އެވެ.