ވަކި ގޮތަކަށް ކަންކަން ކުރުމަށް ފަހު އެއީ ތަގްދީރުގައި ހުރި ގޮތޭ ބުނުމަކުން ނުފުދޭނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފުން ސިލްސިލާކޮށް ބާއްވަމުންދާ ޖަލްސާތަކުގެ ތެރެއިން އާދިއްތަ ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރައީސް ޑރ މުހައްމަދު މުއިއްޒު ރައްޔިތުންނަށް ވީ ވައުދުތައް ނުފުއްދާތީ ނުރުހުން އަމާޒުވަމުންދާއިރު، ރައީސް މުއިއްޒު އުޒުރަކަށް ދައްކަވަމުން ގެންދަވަނީ ތަގްދީރު ކަމަށާ ނަމަވެސް އެއީ ބަލައިގަނެވޭނެ ކަމެއް ނޫން ކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، ރައީސް މުއިއްޒު ކޯޓުތަކަށް އަތް ބާނާ ފަނޑިޔާރުންނަށް ނުފޫޒު ފޯރުވާ އެ ފަނޑިޔާރުންގެ އާއިލީ މީހުންނަށް މަޖިލިސް މެމްބަރުކަން ހަދިޔާގެ ގޮތުގައި ހޯދާދީ ހެދީ ފާޅުކަން ބޮޑުކޮށް ކަމަށާ އެއަށް ފަހު ތިމަން މަނިކުފާނު ކޯޓުތަކަށް ހަގީގަތުގައިވެސް ނުފޫޒު ނުފޯރުވަމޭ ވިދާޅުވެ އެއީ ތަގްދީރުގެ މަތިން ހިނގާ ކަންކަމަށް މަތިކުރުމަކީ ވިޔާނުދާ ކަމެއް ކަމަށްވެސް ރައީސް ޔާމީން ވިދާޅުވިއެވެ.
އެމަނިކުފާނު އިތުރަށް ވިދާޅުވީ، އެހެން މީހުންގެ ޚިޔާނާތުގެ ވާހަކަ ދައްކަން މި ސަރުކާރުން ޓީވީތަކަށް އަރާ ވާހަކަ ދައްކަން ލަދު ގަންނަން ޖެހޭނެ ކަމަށެވެ.
