ރައްޔިތުންގެ މަޖިލީހުގެ އިންތިހާބު ރޯދަ މަހުގެ ތެރޭގައި ނުބާއްވައި ރޯދައިގެ ފަހުން ބާއްވަން ޖެހޭ ގޮތަށް އިންތިހާބުތަކާ ބެހޭ ގާނޫނަށް މަޖިލީހުން ގެނައި އިސްލާހު ރައީސް ޑރ. މުހައްމަދު މުއިއްޒު ތަސްދީގުނުކުރައްވައި އަނބުރާ ފޮނުވާލުމުން މިއަދު ރައްޔިތުންގެ މަޖިލީހުގެ އަގުލަބިއްޔަތުން ދެވަނަ ފަރަހަށް އެ ބިލު ފާސްކޮށްފިއެވެ.

އަންނަ މަހުގެ 17 ވަނަ ދުވަހު ބާއްވަން އިލެކްޝަންސް ކޮމިޝަން (އީސީ) އިން ނިންމި މަޖިލިސް އިންތިހާބު ފަސް ކުރަން ގާނޫނަށް އިސްލާހު ހުށަހެޅީ މަޖިލީހުގެ މެޖޯރިޓީ އޮންނަ އިދިކޮޅު އެމްޑީޕީންނެވެ.

އެ ބިލު ފާސްކުރީ، އެމްޑީޕީއާއި ޑިމޮކްރެޓްސްގެ މެމްބަރުންގެ ވޯޓާއެކުކައިކަން ފާހަގަކޮށްލެވެއެވެ.

ރޯދަ މަހަށް ފަހު އިންތިހާބު ބާއްވަން ގެނައި އެ އިސްލާހު ތަސްދީގު ކުރަން ރައީސް ޑރ. މުހައްމަދު މުއިއްޒަށް ފޮނުވުމުން އެމަނިކުފާނު ނިންމެވީ، ފަސް ސަބަބަކާ ހުރެ އެ ބިލު ތަސްދީގުނުކުރައްވައި އަނބުރާ މަޖިލީހަށް ފޮނުވާލުމަށެވެ.

އެހެންނަމަވެސް، މިއަދު އޮތް ރައްޔިތުންގެ މަޖިލީހުގެ ޖަލްސާގައި އެ ބިލު ދެވަނަ ފަހަރަށް އެޖެންޑާކޮށް ފާސް ކުރަން ނިންމީ 47 މެމްބަރުންގެ ވޯޓާއެކު އެވެ. ނުފެންނަ ކަމަށް ވޯޓު ދިނީ 14 މެމްބަރުން އެކަނިކަން ފާހަގަކޮށްލެވެއެވެ.

ރޯދައިގެ ފަހުން އިންތިހާބު ބާއްވަން އެމްޑީޕީއާއި ޑިމޮކްރެޓްސްއިން ބޭނުންވަނީ ރޯދަ މަހު އިންތިހާބު ބާއްވާ ނަމަ ކެމްޕެއިން ކުރުމަށް ދަތިވާނެ ކަމަށާއި ވޯޓުލާން ނުކުންނަ މީހުންގެ އަދަދު ދަށްވެދާނެ ކަމަށް ބުނެއެވެ.

މަޖިލީހުން އެ ބިލު ފާސްކުރި ފުރަތަމަ ފަހަރު ރައީސް އެ ބިލު ތަސްދީގުނުކުރެއްވީ ބިލުގައި، ގާނޫނު އަސާސީގައި ކަނޑައަޅާފައިވާ އުސޫލުތަކާ ތަޢާރުޟުވާ ކަންކަމާއި، ގާނޫނު އަސާސީގައި ކަނޑައަޅާފައިވާ ގޮތުގެ މަތިން އިންތިހާބުތައް ބޭއްވުމާއި މިނިވަން އިންސާފުވެރި އިންތިހާބެއް ބޭއްވުމަށް ހުރަސްއެޅިދާނެ ފަދަ އިޖްރާއާތުތައް ކަނޑައަޅާފައިވާކަން ފާހަގަކުރައްވައި، އެކަންކަން އިސްލާހުކުރުމަށް ބަދަލުތަކެއް ގެންނަން ޖެހޭކަމަށް ރައީސަށް ބަންޑާރަނައިބު އަހުމަދު އުޝާމް ލަފާދެއްވާފައިވާތީއެވެ.

ގާނޫނުއަސާސީގައިވާ ގޮތުން މަޖިލީހުން ފާސްކޮށްފައި ފޮނުވާ ބިލެއް ތަސްދީގު ކުރައްވަން ރައީސަށް އޮންނަނީ 15 ދުވަހެވެ. އެ ބިލަކަށް ބަދަލެއް ގެންނަން ފެންނަ ނަމަ ރައީސަށް އެ މުއްދަތު ތެރޭގައި އެ ބިލު އަނބުރާ މަޖިލީހަށް ފޮނުވިދާނެއެވެ. އެ 15 ދުވަހުގެ ތެރޭގައި ބިލު އަނބުރާ ނުފޮނުވައިފި ނަމަ ތަސްދީގުވީ ކަމަށް ބަލައި ގެޒެޓުގައި ޝާއިއުކުރަންޖެހޭނެއެވެ.

ތަސްދީގު ނުކުރައްވަން ނިންމަވާ ބިލެއް އެއްވެސް ބަދަލެއް ނުގެނެސް ދެވަނަ ފަހަރަށް ފާސްކުރުމުގެ ފުރުސަތު ވެސް މަޖިލީހަށް އޮވެއެވެ. އެގޮތަށް ދެވަނަ ފަހަރަށް ބިލު ފާސްކޮށްފި ނަމަ ރައީސް އެ ބިލު ތަސްދީގުކުރައްވަން ޖެހޭނެ ކަމަށް ގާނޫނުއަސާސީގައިވެއެވެ.

ރޯދަ މަހަށް ފަހު އިންތިހާބު ބޭއްވުމާ ސަރުކާރު ދެކޮޅެވެ.

ގިނަ ފަރާތްތަކުން ބުނަމުން އަންނަނީ ސަރުކާރުން އީސީ އަށް ނުފޫޒު ފޯރުވަމުން އަންނަކަމަށެވެ.