ދެކެ ދެކެވެސް އޭ ބުނީމާ، ހިތަށް އަރާނީ ދިވެހި ފިލްމްގެ ވާހަކަ ދައްކަން އުޅެނީކަމަށެވެ. އެހެންނަމަވެސް އަޅުގަނޑު ދައްކަން މިއުޅެނީ ފިލްމެއްގެ ވާހަކައެއް ނޫނެވެ. އެހެންނަމަވެސް ފިލްމް ކުޅެން އެ ބޭފުޅަކު ނިކުމެއްޖާ މަޝްހޫރު ބޮލީވުޑް އަދި ހޮލީވުޑްގެ ވެސް ފަންނާނުންނަށްވުރެ ވެސް މޮޅުވާނެކަމާމެދު ޝައްކެއް ނުކުރަމެވެ. އެހެންނަމަވެސް ކުރާނެ ކަމެއް ނެތެވެ. އެބޭފުޅާ މަޝްހޫރުވެފައިވަނީ ހިސާބު މުދައްރިސެއްގެ ގޮތުގައެވެ. އެގޮތައް އެބޭފުޅާ މަޝްހޫރުވި ވާހަކަ މުޅި ރާއްޖެއަށް ވެސް މަޝްހޫރުކަން ޔަގީނެވެ.

ދިވެހި ބަހުގައި އޮވެއެވެ. "މަޑުން ހުންނަ ގުރާ ބާރަށް ދައިގަންނާނެ" އެވެ. މިއީ ކިހާވަރެއްގެ ހަގީގަތެއްކަން މިއަދު ހާމަވެއްޖެއެވެ. މަޑުމަޑުން ހުރެ އެ ކުޅެލީ ކޮންފަދަ ގޭމެއް ބާއެވެ. ހަމަގައިމުވެސް ފުޓްބޯޅަ ނޫންކަން އަޅުގަނޑަށްވެސް އެނގެއެވެ. އާދެ! އަޅުގަނޑު މި ދައްކަނީ ކޮންބޭފުޅެއްގެ ވާހަކަކަން ތި ހުރިހާ ފަރާތްތަކުގެ ސިކުނޑިއަށް މިހާރު ވާނީ އެއްވެސް އިހްތިޔާރެއް ނެތި ވަދެފައެވެ.

އަދުގެ ރައީސް ޑރ.މުހައްމަދު މުއިއްޒުގެ ޚާއްސަ މުޝީރު އާދެ ލ.ފޮނަދޫ އަބްދުއްރަހީމްގެ ވާހަކައެވެ. މަޝްހޫރު ނަމުން ނަމަ އަދުރޭ ގެ ވާހަކައެވެ. އަދުރޭ އަށް އެކި އެކި ނަން ނަމުން އިޝާރަތްކޮށް ވާހަކަ ދައްކާ އަޑުއިވެއެވެ.

ތައުލީމެއް އެހެން އެއްވެސް އެއްޗެއް ނެތް ބޭފުޅެކޭ މީހުން ކިޔާތީ އަޑުއިވެއެވެ. އެހެން ހުއްޓާ އައްޔަން ކުރި މަގާމުގެ ސަބަބުން އަދުގެ ކިޔަވާ ކުދިން ވަރަށް ސުވާލު އުފައްދައެވެ. ކީއްކުރާ އޯލެވެލް ސެޓްފިކެޓެއްހެއްޔެވެ؟ ކީއްކުރާ އޭ ލެވެލެްހެއްޔެވެ؟ ކީއްކުރާ ޑިގްރީ އެއް ހެއްޔެވެ؟ ކިޔެވުމުގެ ބޭނުމެއް ވެސް ނެތް ކަމަށް އެ ކުދިންތައް ކިޔަން ފެށީ އިސާހިތަކުއެވެ.

ޕޯޑިއަމްތަކަށް އަރައިގެން ހަޅޭ ފަޅޭ ޖެހުން ނޫންކަމެއް އަދުރޭ ކުރާ މަންޒަރު ނުފެންނަ ކަމަށް މީހުންބުނެއެވެ.

އަދުރޭ އަށް އަދުގެ ސަރުކާރުން އިތުބާރު ކުރަން ނިންމައިގެން ހުރީމާ އަންނަނީ އެއްކަލަ ހިނިތަކެވެ. އަދުރޭ އަކީ އެއްވެސް ވަރަކަށް އިތުބާރު ކުރެވޭނެ ވަރުގެ މީހެއް ނޫނެވެ. ރައީސް އަބްދުﷲ ޔާމީން އަބްދުލްގައްޔޫމްގެ ފަހަތްޕުޅުގައި ހުންނަވާ ހަންޖަރެއް ހަރާލީ އެއްވެސް ވަރަކަށް ވިސްނާވެސް ނުލައެވެ. މޮޅެތި ވާހަކަތައް ވަރަށް ދެރަވެފައި ދެއްކެވިއެވެ. އެގޮތުން ރައީސް ޔާމިނަށް ނުހައްގުން އަނިޔާ ލިބެމުންދާތީ ހީވަނީ އަމިއްލަ ބައްޕަ އަށް އަނިޔާ ލިބޭހެންނޭ.. އެގޮތް މިގޮތައް ވާހަކަތައް ދެއްކެވިއެވެ. ނަމަވެސް އަދުރޭ މިއަދު ކޮބާހެއްޔެވެ؟ މަކަރު ހެދުމާއި އޮޅުވާލުމުން ހައްދުފަހަނައަޅާފައިވާ ކަމުގެ ތުހުމަތު ތަކެއް ކުރެވިފައިވާ ފަރާތަކަށް ޚާއްސަ މުޝީރުކަން ދެއްވައިގެން ރައީސް މުއިއްޒު އެ އެޅީ ޅަ އެއްނޫންބާއޭވެ.

ދެން ވަޅި އެއް ޖަހާނީ ރައީސް މުއިއްޒުގެ ބުރަކަށްޓަށް ކަމެއް ނޭނގެއެވެ. ރައީސް މުއިއްޒެވެ. އަދުރޭ އަށް ހަމަ މަނިކުފާނުގެ ދެ ލޯ މަރާލައިގެން އިތުބާރު ހަމަ ކުރައްވާނަންތޯއެވެ؟ އެހެންކަމުގައިވާނަމަ، ދެކެ ދެކެ ވެސް މިވަރުގެ ކަމެއް ނުދެކެމެވެ.