ގައުމުގައި ހޮސްޕިޓަލުތަކެއް އެޅުމަކީ ފަސޭހަކަމަކަށް ވެދާނެ ކަމަށާ ނަމަވެސް އެ ހޮސްޕިޓަލުތަކުން ދޭން ޖެހޭ ހިދުމަތްތައް އުނިކަމެއް ނެތި ދިނުމަކީ ޗެލެންޖަކަށް ވެގެންދާނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީންގެ ތާއިދާއެކު ރައްޔިތުންގެ މަޖިލީހަށް ނުކުންނަ ކެންޑިޑޭޓުންގެ ސިޔާސަތުތައް ހާމަކުރުމަށް އާދިއްތަ ދުވަހުގެ ރޭ ބޭއްވި ޖަލްސާގައި ކެންޑިޑޭޓަކަށް އަމާޒުކުރެއްވި ސުވާލުތަކެއްގެ ތެރެއިން ރައީސް ޔާމީން ވިދާޅުވީ ސިއްހީ ނިޒާމަކީ ގައުމެއްގައި އެންމެ ހަރުދަނާ އެއް ނިޒާމުކަމަށް ވާން ޖެހޭއިރު ނިމިދިޔަ ސަރުކާރުން އެންމެ ބޮޑަށް އިހުމާލުވި އެއް ދާއިރާ އެއީ ކަަމަށާ އޭގެ ސަބަބުން ރައްޔިތުން ވަނީ އަސާސީ ހައްގަކުން މަހްރޫމުވެފައި ކަމަށެވެ.

އެކަންކަން ހަރުދަނާ ކުރާނެކަމުގައި ވައުދާއެކު އެމަނިކުފާނުގެ މެނިފެސްޓޯ ތަންފީޒު ކުރަން އައި ސަރުކާރެއް އޮތްއިރު ހޮސްޕިޓަލުތައް އެކި ކަންކޮޅުތަކުގައި އެކި ކަންކަމަށް އެޅުމަކީ އަދި ހައްލެއްގެ ގޮތުގައި ދެކެވަޑައިނުގަންނަވާ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން މިފަދައިން ވިދާޅުވެފައިވަނީ ރާއްޖޭގެ އެކި ހިސާބުތަކުގައި ހޮސްޕިޓަލުތައް އެކި ކަންކަމަށް ޚާއްސަކޮށްގެން އަޅުއްވާނެކަމުގެ ވައުދު ރައީސް ޑރ. މުހައްމަދު މުއިއްޒު ވެވަޑައިގަންނަވަމުން ގެންދަވާ ދަނޑިވަޅެއްގައެވެ.