ރައްޔިތުންގެ މަޖިލީހުގެ އިންތިހާބު މިއަހަރުގެ ރޯދަ މަހުގެ ފުރަތަމަ ހަފްތާގައި ބޭއްވުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.

އީސީން ބުނި ގޮތުގައި 20 ވަނަ މަޖިލިސް އިންތިހާބު ބާއްވާނެ ދުވަހެއް ކަނޑަނޭޅި ލަސްވެފައިވަނީ މިއަހަރުގެ ރޯދަމަހާއި ދިމާވާތީ އިދާރީ ބޮޑެތި ހުރަސްތަކެއް ހުރުމުންކަމަށެވެ.

އެގޮތުން އީސީން ނެރުނު ބަޔާނެއްގައި ވަނީ މިއަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިހާބު، 1445 ވަނަ އަހަރުގެ ރަމަޟާން މަހާއި ދިމާވާތީއާއި ރަމްޟާން މަހުގެ ފަހުގެ ތާރީހެއްގައި ބޭއްވުމަށް އިދާރީ ބޮޑެތި ހުރަސްތަކެއް ހުރުމާއި، ތައުލީމާ ބެހޭ ވުޒާރާއިން އިސްލާހުކޮށް އާންމު ކޮށްފައިވާ ދިރާސީ ކަލަންޑަރުގައިވާ ގޮތުން އީދު ބަންދަށްފަހު، ފެށޭ ހަފްތާއަކީ ސްކޫލްތަކުގެ އިމްތިހާނު ދުވަސްތަކަށްވާތީ، ސްކޫލްތައް ލިބުން ދަތިވެ ވޯޓުލާ މަރުކަޒުތައް ގާއިމު ކުރުމަށްޓަކައި ކޮމިޝަނުން އެކަށީގެންވާ ތަންތަން ނުލިބޭނެ ކަމަށް ލަފާ ކޮށްފައެވެ.

އެހެންކަމުން ރަމަޟާން މަހުގެ ފަހު 10 ގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި މިހާރު ކަނޑައަޅުއްވާފައިވާތީ ސަރުކާރުގެ ވުޒާރާތަކާއި ދައުލަތުގެ މުއައްސަސާތަކުގެ އެހީތެރިކަމާއި އެއްބާރުލުމާއެކު ކުރަން ޖެހޭ މަސައްކަތްތައް ކުރުމުގައި ދަތިތަކެއް ދިމާވާނެތީ އީސީން ވަނީ މިއަހަރުގެ މާޗް މަހުގެ 17 ވާ އާދިއްތަ ދުވަހު މި އިންތިހާބު ބޭއްވުމަށް ނިންމާފައެވެ.

ފާހަގަކޮށްލެވޭ ގޮތުގައި އީސީން މި ނިންމުން ނިންމާފައިވަނީ ސަރުކާރުގެ ނުފޫޒުންނެވެ.

އީސީން ނިންމާފައިވާ މި ދުވަސް ދިމާވަނީ މިއަހަރުގެ ރޯދަ މަހަހުގެ ފުރަތަމަ ހަފްތާގެ ބަންދާއެވެ.