އައްޑޫ ސިޓީ ކައުންސިލް އެކުލަވާލާފައިވާ ގޮތަށް ބަދަލު ގެނައުމަށްޓަކައި ރައްޔިތުންގެ ހިޔާލު ހުރި ގޮތް ދެނެގަތުމުގެ ގޮތުން ނަގާ އާންމު ވޯޓު މިމަހުގެ 25 ވަނަ ދުވަހު ނެގުމަށް އިލެކްޝަންސް ކޮމިޝަން (އީސީ) އިން ނިންމައިފި އެވެ.
އީސީން މިއަދު ބުނީ އައްޑޫ ސިޓީ ކައުންސިލަށް ބަދަލު ގެނައުމުގެ އިއުލާނާ އެކު އާންމުކޮށްފައިވާ ރައީސްގެ ގަރާރުގައި ހިމަނުއްވާފައިވާ ސުވާލުތަކާ މެދު ހުޅުދު އާއި މީދު އާއި ފޭދޫ ރައްޔިތުން ދެކޭ ގޮތް ބެލުމަށް ބާއްވާ ހިޔާލު ހޯދުމުގެ ވޯޓު ނެގުން ކުރިއަށް ދާނީ މިމަހުގެ 25ވާ ހޮނިހިރު ދުވަހުގެ ހެނދުނު 8:00 އިން ހަވީރު 4:00 އަށް ކަމަށެެވެ.
ވޯޓު ނަގައި ނިމޭތާ 30 މިނެޓު ފަހުން ވޯޓު ގުނާނެ ކަމަށާއި އެކަމަކު ވޯޓުގެ ރަސްމީ ނަތީޖާ އިއުލާނުކުރާނީ އާދިއްތަ ދުވަހު ކަމަށްވެސް އީސީން ބުނެފައިވެއެވެ.
ރައްޔިތުން އައްޑޫ ކައުންސިލް ބަދަލުކުރުމަށް އެދޭކަމަށް ސަރުކާރުން ބުނި ނަމަވެސް މައުލޫމާތު ލިބުނު ގޮތުގައި އައްޑޫ ސިޓީ ކައުންސިލްގެ މޭޔަރަކަށް އެެމްޑީޕީއަށް ނިސްބަތްވާ ފަރާތެއް ހުންނަވާ ސަރުކާރުގެ އަމަލުތަކަށް ފާޑުކިޔާތީ ސަރުކާރުން ވަނީ އޭނާ ވަކި ކުރުމަށް ދުރާލާ ރާވާފައެވެ.
