ޓެކްސް އެޕީލް ޓްރައިބިއުނަލްގެ ހުސްވެފައިވާ ދެ މަގާމަށް ބޭފުޅުން އައްޔަނުކުރަން ރައްޔިތުންގެ މަޖިލީހުން ފާސްކޮށްފިއެވެ.
ރައްޔިތުންގެ މަޖިލީހުގެ ޖަލްސާގައި ފާސްކުރީ އެ ދެ މަގާމަށް އިބްރާހިމް އަފީފާއި ޝައުފާ އިބްރާހިމް އައްޔަނުކުރުމަށެވެ.
މި މަގާމުތަކަށް ރައީސް މުހައްމަދު މުއިއްޒު ހުށަހެޅުއްވި ހަތް ނަމުގެ ތެރެއިން މަޖިލީހުން ވޯޓު ނެގުނު ތިން ނަމުގެ ތެރެއިން، އިބްރާހިމް އަފީފަށް 52 މެންބަރުންގެ ތާއީދު ލިބުނު އިރު، ޝައުފާ އިބްރާހިމަށް 54 މެންބަރުންގެ ތާއީދު ލިބިވަޑައިގެންނެވިއެވެ. އެހެންނަމަވެސް، ސުޕްރީމް ކޯޓުގެ ފަނޑިޔާރުކަމުން ވަކިކޮށްފައިވާ މަހާޒް އަލީ ޒާހިރަށް ލިބިވަޑައިގެންނެވީ ހަތަރު މެންބަރުންގެ ތާއީދެވެ.
ރައީސް މުއިއްޒު މަޖިލީހަށް ފޮނުއްވި ލިސްޓުގައި ހިމެނިވަޑައިގަންނަވާ އެހެން ބޭފުޅުންގެ ތެރޭގައި ރ. ހުޅުދުއްފާރު، ރޯޒްވިލާ، އާޝިޔާ އަޒީމާއާއި، ޝިފާޒް އަލީ (ދަފްތަރު ނަންބަރު 12504)، ފާތިމަތު ނައުޝާން (ޅ. ނައިފަރު، ފިޔާތޮށިގެ) އަދި އަހުމަދު ޔާމީން (ބީޗްކޯނަރު، ގދ. ގައްދޫ) ހިމެނިވަޑައިގަންނަވައެވެ.
މި މަގާމުތަކަށް މެންބަރުން ހޮވުމަށް ވޯޓު ނެގުނީ ޓެކްސް އެޕީލް ޓްރައިބިއުނަލްގެ ދެ މަގާމެއް ހުސްވުމާ ގުޅިގެން، އެ މަގާމުތަކަށް ކުރިމަތިލުމަށް ހުޅުވާލުމުން ކުރިމަތިލެއްވި ފަރާތްތަކުގެ ތެރެއިންނެވެ.
