ރައްޔިތުންގެ މަޖިލިސް މެންބަރުންގެ ތަސައްރަފު ފުދޭތޯ މިހާރު ސުވާލު އުފެދޭކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފްގެ ޓައުން ހޯލް ޖަލްސާގައި ވާހަކަފުޅުދައްކަވަމުން ރައީސް ޔާމީން މިފަދައިން ވިދާޅުވީ ރައްޔިތުންގެ މަޖިލީހުގެ ރަސްމީ ޖަލްސާއެއްގައި ޕީއެންސީއަށް ނިސްބަތްވެވަޑައިގަންނަވާ މެންބަރަކު ދެއްކެވި ވާހަކައަށް ފާޑުވިދާޅުވަމުންނެވެ.

މިގޮތުން، މަޖިލިސް މެންބަރުން ބޭނުންފުޅުވާނަމަ ރައީސް މުއިއްޒަށް އުމުރަށް ވެރިކަމުގައި ހުރެވޭ ގޮތަށް ނުވަތަ 15 އަހަރަށް ވެރިކަމުގައި ދެމިހުރެވޭނެ ގޮތަށް ނިންމެވިދާނެކަމަށް ވިދާޅުވި ވިދާޅުވުމަށް ފާޑުވިދާޅު ރައީސް ޔާމީން ވިދާޅުވީ ސަރުކާރަށް ނިސްބަތްވާ މެންބަރުން އަންނަނީ ގާނޫނު ނަހަމަ ގޮތުގައި ބޭނުންކުރުމަށް ފާޅުގައި ވާހަކަދައްކަމުން ކަމަށެވެ.

މީގެ އިތުރުން، ގާނޫނީ މުއައްސަސާތައް ހިމެނޭހެން ސަރުކާރުގެ އިދާރާތަކުން ގާނޫނު "އެބިއުޒް" ކުރާ ކަމަށް އެމަނިކުފާނުގެ ވާހަކައިގައި ވަނީ ސިފަކޮށްފައެވެ.

މިއާއިއެކު ގާނޫނުގައި ބަޔާންކޮށްފައިވާ ހައްގުތައް ވަކި ފަރުދުންނަށް ލިބިފައި އަނެއްބައި މީހުންނަށް ނުލިބުމަކީ ސަރުކާރުގެ ފެއިލްވެ ސަރުކާރަށް ދެވިފައިވާ ބާރުތަކުގައި ޗޭނު ޖަހަންޖެހޭ ސަބަބެއް ކަމުގައި އެމަނިކުފާނު ފާހަގަކުރެއްވިއެވެ.

ގާނޫނެއް ނެތުމަކީ ރައްޔިތުންނަށް ލިބިދޭން ޖެހޭ ހައްގުތަކުން މަހުރޫމްވާނެ ޖެހޭ ސަބަބެއް ނޫންކަމަށްވެސް ރައީސް ޔާމީން ވިދާޅުވިއެވެ.