ރައްޔިތުންގެ މަޖިލީހުގެ އިންތިޚާބު ބޭއްވުމަށް ހަމަޖެހިފައިވާ ގޮތާއި ގުޅޭގޮތުން މިނިވަން މުއައްސަސާތަކުގެ ކޮމިޓީން އިލެކްޝަންސް ކޮމިޝަން (އީސީ)އާ ބައްދަލުކުރަން ނިންމައިފިއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ މުގައްރިރު އަދި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް "އެކްސް" ގައި ކުރެއްވި ޕޯސްޓެއްގައި ވިދާޅުވީ މަޖިލިސް އިންތިހާބު ބޭއްވުމަށް ހަމަޖެހިފައިވާ ގޮތާ ގުޅޭގޮތުން އަންނަ ހޯމަ ދުވަހު އިލެކްޝަންސް ކޮމިޝަނާ މިނިވަން މުއައްސަސާ ކޮމިޓީން ބައްދަލުކުރާނެ ކަމަށެވެ.

ރޮޒައިނާގެ ޕޯސްޓްގައި މަޖިލިސް އިދާރާ އިން އިީސީގެ ރައީސް ފުއާދު ތައުފީގަށް ފޮނުވި ސިޓީއެއް ވެސް ހިއްސާކޮށްފައިވެއެވެ.

އެ ސިޓީގައި އިންތިޚާބު ބޭއްވުން ލަސްކުރާ ބިލް ދެވަނަ ފަހަރަށް ފާސް ކުރުމުން، އިންތިޚާބު ބޭއްވުމަށް ހަމަޖެހިފައިވާ ގޮތާއި ގުޅޭގޮތުން ކޮމިޓީން މަޝްވަރާ ކުރަން ބޭނުންވާ ކަމަށް ވަނީ ބުނެފައެވެ.

މާރޗް 4 ވަނަ ދުވަހުގެ 11:00 ޖަހާއިރަށް މިނިވަން މުއައްސަސާތަކުގެ ކޮމިޓީގެ ބައްދުލުވުމަށް ވަޑައިގަތުމަށް ވަނީ އެދިފައެވެ.

ރައްޔިތުންގެ މަޖިލީހުގެ އިންތިހާބު ރޯދަ މަހުގެ ތެރޭގައި ނުބާއްވައި، ރޯދައިގެ ފަހުން ބާއްވަން ޖެހޭ ގޮތަށް އިންތިހާބުތަކާ ބެހޭ ގާނޫނަށް މަޖިލީހުން ގެނައި އިސްލާހު ރައީސް ޑރ. މުހައްމަދު މުއިއްޒު ތަސްދީގުނުކުރައްވައި އަނބުރާ ފޮނުވާލުމުން އިއްޔެ ރައްޔިތުންގެ މަޖިލީހުގެ އަގުލަބިއްޔަތުން ދެވަނަ ފަރަހަށް އެ ބިލު ވަނީ ފާސްކޮށްފައެވެ.