20 ވަނަ ރައްޔިތުންގެ މަޖިލީހުގެ އިންތިހާބު ރޯދަ މަހު ނުބޭއްވޭ ގޮތަށް ފާސްކުރި ބިލު ތަސްދީގު ކުރެއްވުން ރައީސް ޑރ.މުހައްމަދު މުއިއްޒުއަށް ލާޒިމު ކަމަށް ކުރީގެ ޕްރޮސެކިއުޓާ ޖެނެރަލް އަހުމަދު މުއިއްޒު ވިދާޅުވެއްޖެ އެވެ.

ވަކީލު މުއިއްޒު މިފަދައިން ވިދާޅުޅުވީ "އެކްސް" ގައި ކުރެއްވި ޕޯސްޓެއްގައިއެވެ.

އެގޮތުން މަޖިލީހުން އެ ބިލު ފާސްކޮށްފައި ވަނީ ސުޕްރީމް ކޯޓުގެ ހުކުމްގައި ބުނާ އުސޫލުން މެމްބަރުންގެ އަދަދު ގުނުމުން ފާސް ކުރުމަށް ބޭނުންވާ އަދަދަށްވުރެ ބޮޑު އަގުލަބިއްޔަތަކުން ކަމަށެވެ. އެ ބިލު ފާސްކުރީ 47 މެމްބަރުންގެ ވޯޓުންނެވެ.

ރައީސް މުއިއްޒު ވަނީ މިކަމުގައި ރައްޔިތުން މަޖިލީހުން ރުހުން ދެއްވާފައިނުވާ ބަންޑާރަ ނައިބުގެ ލަފާއަށް އެދޭނެކަމަށް ވިދާޅުވެފައެވެ.

އެމަނިކުފާނު މިހެން ވިދާޅުވި ނަމަވެސް, ގާނޫނުއަސާސީގެ 91 ވަނަ މާއްދާގެ ށ. ގައި ބުނާ ގޮތުން އިންތިހާބު ފަސް ކުރުމާ ބެހޭ ބިލު މިހާރު ތަސްދީގު ކުރައްވައި، ގެޒެޓުގައި ޝާއިއު ކުރަންޖެހިވަޑައިގަންނަވާނެ އެވެ.

މި އަހަރުގެ މަޖިލިސް އިންތިހާބު ބާއްވަން އިލެކްޝަންސް ކޮމިޝަނުން ނިންމާފައި ވަނީ މާޗު 17، ގައި ކަމަށްވާއިރު، އެއީ ރޯދަމަހުގެ ހަތް ވަނަ ދުވަހެވެ.

ނަމަވެސް މަޖިލީހުން ފެބްރުއަރީ 11، ގައި ފާސްކުރީ ރޯދަމަހުގެ ތެރެއަށް އިންތިހާބެއް ބާއްވަން ޖެހޭ ގޮތަށް ދިމާވާ ހާލަތްތަކުގައި އިންތިހާބު ބާއްވާނީ ރޯދަމަސް ނިމޭތާ 10 ދުވަސް ފަހުން ކަމަށެވެ.