ރައީސް ޑރ މުހައްމަދު މުއިއްޒު ވެރިކަމާ ހަވާލުވިފަހުން ގާނޫނު ނަގަހައްޓަން ތިބި ފަރާތްތަކުން ޖަރީމާތައް ހިންގުން އާންމުވެއްޖެ ކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ވަގަށް އެތެރެ ކުރަނިކޮށް ހިފެހެއްޓި ދެ ކޮންޓެއިނަރ ސިނގަރޭޓު ވަގަށް ނެގުމުން އެކަމަށް އިޝާރާތްކުރައްވާ ޑރ ޖަމީލު އެކްސްގައި ކުރެއްވި ޕޯސްޓެއްގައި ވިދާޅުވީ، ވެރިކަމާ ރަީސް މުއިއްޒު ޙަވާލުވި ފަހުން ޤާނޫނު ނަގަހައްޓަން ތިބޭ ފަރާތްތަކުން ތަކުރާރުކޮށް މިފަދަ ޖަރީމާތައް ހިންގަމުންދާ ކަމަށާއި، މިއީ މިހާރު އާއްމު ކަމަކަށް ވެފައިވާ ކަމަށެވެ.

ހަމައެހެންމެ ފުލުހުންނާއި، ކަސްޓަމްސް ފަދަ ތަންތަން މިފަދަ ދަށު ދަރަޖައަށް ވެއްޓިގެން ދިއުމަކީ ޤައުމެއް ފެއިލްޑް ސްޓޭޓަކަށް ވެއްޖެކަމުގެ ހެކި ކަމުގައި ޑރ ޖަމީލް ވަނީ ވިދާޅުވެފައެވެ.

މި މައްސަލަ މިހާރު ފުލުހުން ދަނީ ތަހުގީގު ކުރަމުންނެވެ. ނަމަވެސް މި މައްސަލައާ ގުޅޭ އިތުރު މައުލޫމާތެއް އަދި ފުލުހުން ހާމައެއް ނުކުރެއެވެ. ނަމަވެސް އެމްޕީއެލްގައި ކުރިން މަސައްކަތްކޮށްފައިވާ ބައެއް އިސް ފަރާތްތަކުން ހާމަކޮށްފައިވާ ގޮތުގައި ވަގަށް ދެ ކޮންޓެއިނަރ ބޭރުމަކީ ކުރެވިދާނެ ކަމެއް ނޫނެވެ. ނަމަވެސް ރުހުމުގައި ޑީލެއްގެ ދަށުން އެކަން ކުރެވިދާނެ ކަމަށް އެ ބޭފުޅުން ވިދާޅުވެފައިވެއެވެ.