ޑޫރަންޑް ލައިންގައި ހިނގި ވަރުގަދަ ހަމަލާތަކުގައި ޕާކިސްތާން ސިފައިން ތާލިބާނުންގެ ބޯޑަރުގެ ޕޯސްޓުތައް ކާމިޔާބުކަމާއެކު ޕާކިސްތާނުގެ ކޮންޓްރޯލްގެ ދަށަށް ގެނެސްފިއެވެ.
ރޭގެ ވަގުތެއްގައި ޕާކިސްތާނުގެ ސަލާމަތީ ބާރުތަކުން ބަދަލު ހިފުމުގެ އޮޕަރޭޝަންތައް ފެށީ އަނގޫރު އައްދާ، ބަޖާއުރު، ކުރުރަމް، ދިރު، ޗިޓްރާލް، އަދި ބަހުރާމް ޗާ ފަދަ ބޯޑަރުގައި ހިމެނޭ ބައެއް ސަރަހައްދުތަކުގައި އަފްޣާނިސްތާނުގެ ސިފައިން ހަމަލާދޭން ފެށުމުންނެވެ.
ޕާކިސްތާނުގެ އަސްކަރިއްޔާއިން ވަނީ އަފްޣާނިސްތާނުގެ ޕޯސްޓުތަކަށް އަމާޒުކޮށްގެން އާޓިލަރީ އާއި ޓޭންކު އަދި ޑްރޯން ފަދަ ހަތިޔާރު ބޭނުންކޮށްފައެވެ. އެ ހަމަލާތަކުގައި އަފްޣާނިސްތާނުގެ ބޯޑަރު 19 ޕޯސްޓެއް އެ ގައުމުން ވަނީ އަތުލައިގަނެފައިވެއެވެ.
ޕާކިސްތާނުގެ ސްޓޭޓް ބްރޯޑްކާސްޓަރު ޕީޓީވީން ވަނީ ބޯޑަރު ޕޯސްޓްތަކުގައި އަފްޣާނިސްތާނު ސިފައިން ކުރުރާމްގައި ޕާކިސްތާނު ސިފައިންނާ އަމާންދިން ކަމަށް ބުނާ ފޫޓޭޖެއް ދައްކާފައެވެ. ޕާކިސްތާނުން ވަނީ މަނޯޖްބާ ބެޓޭލިއަންގެ މައި މަރުކަޒާއި ޚަރްޗާރު ކިއްލާ ހިމެނޭ ގޮތަށް ތާލިބާނުންގެ ބައެއް ތަންތަން ނައްތާލާފައިވާ ކަމަށް ބުނެފައެވެ.
މީގެ އިތުރުން، މި ހަނގުރާމައިގައި ތާލިބާނުންނަށް އިންޑިއާގެ މޯދީ ސަރުކާރުން ވާގިވެރިވަމުން އަންނަ ކަމަށް ޕާކިސްތާނުން ތުހުމަތުކުރެއެވެ. ޕާކިސްތާނުން ބުނާ ގޮތުގައި ބޭރުގެ ބައެއްގެ އެހީތެރިކަމާއި ނުލާ ތާލިބަނުންނަށް މިފަދަ ހަމަލާތައް ނުދެވޭނެ ކަމަށެވެ.
