މީހުން ދިރި ނޫޅޭ އެޕާޓުމަންޓެއްގެ ކަރަންޓު ބިލަށް ހާހުން މައްޗަށް ބިލުކުރާ މައްސަލައެއް ފެންމަތިވެއްޖެއެވެ.

އެޕާޓުމަންޓުގެ ވެރިމީހާ ސޯޝަލް މީޑިޔާގައި ކޮށްފައިވާ ޕޯސްޓެއްގައި ބުނެފައިވަނީ އޭނާގެ އެ އެޕާޓުމަންޓަކީ މި އަހަރުގެ އޮގަސްޓު މަހުން ފެށިގެން ހުސްކޮށް ހުންނަ އެޕާޓުމަންޓެް ކަމަށާ އެތަނަކީ އެ މަހުން ފެށިގެން އެއްވެސް މީހަކު ދިރިއުޅޭ އަދި ކަރަންޓުވެސް ބޭނުންކުރާ އެޕާޓުމަންޓެއް ނޫން ކަމަށެވެ.

ނަމަވެސް ސެޕްޓެމްބަރު މަހުގެ ބިލުކަމުގައި ބުނެ ހަދާފައި އިން ކަރަންޓު ބިލަށް 1200 ރ އަށް ވުރެ މައްޗަށް ފައިސާ އަރަން ޖެހުނު ސަބަބެއް ނުވިސްނޭ ކަމަށާ ނަމަވެސް އޭނާ މިހާރު ބިލު ދައްކާފައިވާ ކަމަށް ވެސް ޕޯސްޓުގައި ބުނެފައިވެއެެވެ. އޭނާ ވަނީ ކަރަންޓު ބިލުގެ ތަފްސީލު ފެންނަ ފޮޓޯއެއްވެސް ހިއްސާކޮށްފައެވެ.

އެމީހާ އިތުރަށް ބުނެފައިވަނީ މިއީ އޭނާ ސަރުކާރާ ދެކޮޅު މީހަކަށް ވެގެން ދައްކާ ވާހަކައެއް ނޫން ކަމަށާ މިއީ ތެދު ހަގީގަތް ކަމަށެވެ. އަދި ރައީސް މުހައްމަދު މުއިއްޒުގެ ސަރުކާރުން މި މިންވަރަށް ރައްޔިތުން "ފެލަން" ހެޔޮ ނުވާނެ ކަމަށް ބުނެ އެމީހާ ވަނީ ނުުރުހުން އަމާޒުވެފައެވެ.

މިފަދަ މައްސަލަތަކާ އަދި ކަރަންޓުގެ މައްސަލައަށް ހައްލު ނުލިބޭތީ ރައްޔިތުންގެ ނުުރހުން އަމާޒުވުމުން ރައީސް މުއިއްޒު ވަނީ ކުރިން ސްޓެލްކޯގެ އެމްޑީގެ މަގާމުގައި ހުރި ފަހުމީ ވަކިކޮށް، ރައީސް މުއިއްޒުގެ ވަރަށް ގާތް މީހެއް ކަމަށްވާ ޝަމާހު ރަޝީދު ސްޓެލްކޯގެ އެމްޑީ ކަމަށް އައްޔަންކޮށްފައެވެ.

ނަމަވެސް އެއް މަސް ދުވަސް ފާއިތުވެގެން ދިޔައިރުވެސް އެއިން ކަމަކަށް ހައްލު ލިބިފައިނުވާ ކަމަށް ރައްޔިތުން ބުނެ ޝަކުވާތައް ކުރުން ގިނަވެފައިވެއެވެ.