ރައްޔިތުންގެ ޚިޔާލު ހޯދުމުގެ އާންމު ވޯޓެއް ނެގުމުގައި ރައްޔިތުންގެ މަޖިލީހުން އަމަލުކުރާނެގޮތުގެ ގަވާއިދު ފާސްކޮށްފިއެވެ.

މި ގަވާއިދުގެ ދަށުން، ރައްޔިތުންގެ ޚިޔާލު ހޯދުމުގެ އާންމު ވޯޓު ނެގުމުގެ ގާނޫނާ އެއްގޮތްވާ ގޮތުގެ މަތިން، މަޖިލީހަށް މުހިންމު ކަމަށް ފެންނަ ކަންތައްތަކުގައި ރައްޔިތުންގެ ޚިޔާލު ހޯދުމަށް އާންމު ވޯޓެއް ނެގުމަށް ގާރާރަކުން ކަނޑައެޅިދާނެއެވެ.

މީގެ އިތުރުން، ގާނޫނުއަސާސީއަށް އިސްލާހެއް ގެނައުމަށް މަޖިލީހުން ފާސްކުރާ ބިލެއް، ރައީސުލްޖުމްހޫރިއްޔާ ތަސްދީގުނުކޮށް އަނބުރާ ފޮނުވާލާ ހާލަތްތަކުގައިވެސް ރައްޔިތުންގެ ޚިޔާލު ހޯދުމަށް ވޯޓެއް ނެގިދާނެކަމަށްވެސް ގަވާއިދުގައި ބުނެފައިވެއެވެ.

މި ގަވާއިދުގައިވާ ގޮތުން، ރައްޔިތުންގެ ޚިޔާލު ހޯދަން މުހިންމު ކަމަށް ފެންނަ ހާލަތްތަކުގައި ވަކިވަކި މެންބަރުންނަށާއި މަޖިލީހުގެ ރައީސަށް ވޯޓަށް އެހުމަށް ހުށަހެޅިދާނެއެވެ. އެހެންނަމަވެސް، ރައީސުލްޖުމްހޫރިއްޔާ އަލުން ވިސްނުމަށް ފޮނުވާ ބިލުތަކުގައި ރައްޔިތުންގެ ޚިޔާލު ހޯދުމަށް ވޯޓަށް އެހުމަށް ހުށަހެޅުމުގެ އިޚްތިޔާރު ލިބިގެންވަނީ ހަމައެކަނި މަޖިލީހުގެ ރައީސަށެވެ.

ގަވާއިދުގައި ބަޔާންކޮށްފައިވާ ގޮތުން، މެންބަރަކު ނުވަތަ ރައީސް ރައްޔިތުންގެ އާންމު ވޯޓެއް ނެގުމަށް ޤަރާރު ހުށަހެޅުމުން، އެކަން ދިރާސާކުރުމަށް ދާއިމީ ނުވަތަ ވަގުތީ ކޮމިޓީއަކަށް ފޮނުވަންޖެހެއެވެ. އަދި މި ގަރާރު ހުށަހަޅާތާ 14 ދުވަހުގެ ތެރޭގައި ކޮމިޓީން ގޮތެއް ނިންމައި، ރިޕޯޓު މަޖިލީހަށް ހުށަހަޅަންޖެހެއެވެ.