ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނޭޝަނަލް އިންޓަގްރެޓީ ކޮމިޝަނަށް އައްޔަން ކުރެއްވުމަށް ހުށަހެޅުއްވި ހުރިހާ ނަމެއް ރައްޔިތުންގެ މަޖިލީހުން ފާސްކޮށްފިއެވެ.

ކޮމިޝަނަށް އައްޔަން ކުރަން މަޖިލީހުން މިއަދު ފާސްކުރީ އަލްއުސްތާޛް ޝުޢައިބް ޢަބްދުއްރަޙްމާން، އަލްއުސްތާޛް ޝިފާޒް އަލީ، އަލީ މުޙައްމަދު މަނިކު އަދި ފާތިމަތު ޝަރީފް އެވެ. މިނިވަން މުއައްސަސާތަކުގެ ކޮމިޓީން މި ހަތަރު ބޭފުޅުންނާ އިންޓަވިއު ކުރުމަށްފަހު، ވަކިވަކިން މާކްސް ދެއްވާފައިވެއެވެ. ކޮމިޓީން ހުރިހާ ބޭފުޅުންނަށްވެސް 75 އިންސައްތައަށްވުރެ މަތިން މާކްސް ލިބިވަޑައިގެންފައިވާތީ، ކޮމިޝަނަށް އެބޭފުޅުން އައްޔަންކުރުމަށް ފެންނަކަމަށް ކޮމެޓީން ނިންމާފައިވެއެވެ.

މަޖިލީހުގެ ވޯޓުގައި ބައިވެރިވި ހުރިހާ މެންބަރުންގެ އިއްތިފާގުން ވަނީ ހަތަރު ބޭފުޅުންނަށްވެސް ރުހުން ދެއްވާފައެވެ. ހަތަރު ބޭފުޅުން އިންޓަގްރިޓީ ކޮމިޝަނަށް އައްޔަން ކުރަން މަޖިލީހަށް ހުށަހެޅީ މި މަހުގެ 26 ވަނަ ދުވަހު ދައުރު ހަމަވާ ހަތަރު މެންބަރުންގެ މަގާމުތަކަށް އައު މެންބަރުން އައްޔަންކުރުމެވެ.

ނޭޝަނަލް އިންޓެގްރިޓީ ކޮމިޝަނަކީ ފަސް މެންބަރުންގެ މައްޗަށް އެކުލެވޭ މުއައްސަސާއެކެވެ.