ރައްޔިތުންގެ މަޖިލިހުން އިއްޔެ ފާސްކުރި ބިލް ރައީސް މުއިއްޒު ތަސްދީގު ކުރެއްވުމުން ކުރިއަށް އޮތް ރޯދަ މަހު މަޖިލިސް އިންތިޚާބު ބާއްވަން ނިންމާފައި އޮތް ނިންމުން ބަދަލުކުރާނެކަމަށް އިލެކްޝަންސް ކޮމިޝަނުން ބުނެފިއެވެ.

މަޖިލިސް އިންތިހާބު މިހާރު ބާއްވާ ތާރީހު ކަމަށްވާ 17މާޗު (ރޯދަ މަހުގެ ހަތް ވަނަ ދުވަސް)ގެ ބަދަލުގައި، އެ މަސް ނިމިގެން 10 ދުވަސް ފަހުން އެ އިންތިހާބު ބާއްވަން އިންތިހާބުތަކާ ބެހޭ ގާނޫނަށް އިދިކޮޅު އެމްޑީޕީން ހުށަހެޅި އިސްލާހު ދެވަނަ ފަހަރަށް އިއްޔެ މަޖިލީހުން ވަނީ ފާސްކޮށްފައެވެ.

ފާސްކުރި ގާނޫނުގައި ވާގޮތުން އިންތިޚާބު ބާއްވަން ޖެހެނީ ރޯދަމަސް ނިމިގެން 10 ދުވަސް ފަހުންނެވެ.

މިކަމާ ގުޅިގެން އީސީގެ ނިންމުމަކީ ކޮބައިކަމާ މެދު ގިނަ ބަޔަކު ބަލަބަލާ ތިއްބާ އީސީއިން ބޭއްވި ބައްދަލުވުމުގައި ކޮމިޝަންގެ ނައިބު ރައީސް އަދި ތަރުޖަމާނު އިސްމާއިލް ހަބީބު ވިދާޅުވީ ކޮމިޝަނުން އަމަލުކުރާނީ ގާނޫނާ އެއްގޮތަށް ކަމަށެވެ. އަދި ރައީސް އެ ތަސްދީގުނުކުރައްވާހާ ހިނދަކު މަޖިލިސް އިންތިހާބުގެ ތާރީހަށް ބަދަލެއް ނާންނާނެ ކަމަށްވެސް ހަބީބު ވިދާޅުވިއެވެ.

ހަބީބް ވިދާޅުވީ، އެ އިސްލާހު ގާނޫނަކަށްވުމުން އިލެކްޝަންސް ކޮމިޝަނުން ދެން އެކަމުގައި އަމަލުކުރާނެ ގޮތެއް ނިންމާނެ ކަމަށެވެ.

މިދިޔަ ނޮވެމްބަރު މަޖިލީހުގެ މިނިވަން މުއައްސަސާތަކުގެ ކޮމިޓީން ބޭއްވި ބައްދަލުވުމެއްގައި އިލެކްޝަންސް ކޮމިޝަނުގެ ރައީސް ފުވާދު ތައުފީގް ވަނީ، ރަމަޟާން މަސް ފެށުމުގެ ކުރިން މަޖިލީހުގެ އިންތިހާބު ބޭއްވޭ ގޮތަށް ގާނޫނު އިސްލާހުކުރުމަށް ހުށަހަޅުއްވައިފައެވެ. އަދި މިއަދު ނ. ކެނދިކުޅުދޫގައި ދެއްކެވި ވާހަކަފުޅުގައި ރައީސް ވަނީ، ރަމަޟާން މަހުގެ ކުރިން މަޖިލީހުގެ އިންތިހާބު ބާއްވަން ބޭނުންފުޅުވެވަޑައިގެންނެވިކަން ހާމަކުރައްވައިފައެވެ.

އަދި މިއަދު ސުޕްރީމް ކޯޓުން ރައްޔިތުންގެ މަޖިލީހުގެ ގާނޫނީ އަދަދު ކަނޑައަޅާ ގޮތުގެ މައްސަލައަށް ކުރި ހުކުމާ ގުޅިގެން ބަންޑާރަ ނައިބު އަހްމަދު އުޝާމްގެ ލަފަޔަކަށް އެދިވަޑައިގެންފައިވާ ކަމަށާއި، ގޮތެއް ނިންމެވޭނީ އުޝާމްގެ ލަފާގެ މަތިން ކަމަށް ވިދާޅުވެ، ރައީސް ވަނީ މަޖިލީހުން ފާސްކުރި ބިލު ތަސްދީގުކުރަން އުޝާމް ލަފާ ދެއްވައިފިނަމަ އެގޮތަށް އަމަލުކުރައްވާނެ ކަމަށް ވިދާޅުވެފައެވެ.

އެކްސްގައި ކުރެއްވި ޕޯސްޓެއްގައި އުޝާމް ވިދާޅުވީ، އިންތިހާބުތަކާ ބެހޭ އާންމު ގާނޫނަށް އިސްލާހު ގެނައި ބިލު ތަސްދީގުކުރުމާ މެދު މިއަދު ރައީސަށް ލަފާ އަރުއްވާނެ ކަމަށެވެ.

ގާނޫނު އަސާސީގައިވާ ގޮތުން، ރައްޔިތުންގެ މަޖިލީހަށް ރައީސް އަނބުރާ ފޮނުވާ ބިލެއް އެއްވެސް ބަދަލެއް ނުގެނެސް މެންބަރުން ދެވަނަ ފަހަރަށް އެ ބިލެއް ފާސްކޮށްފި ނަމަ، އެ ބިލެއް ތަސްދީގުކޮށް ގެޒެޓުގައި އާންމުކުރަން ރައީސަށް މަޖުބޫރުވާނެއެވެ.