އިތުރު ލުއިތަކެއް ދިނުމަށް މި ސަރުކާރުން ޖެހިލުންވެވަޑައިގެންނަވަނީ ކޮން ސަބަބަކާހުރެތޯ އައްސަވާ ރައީސް އަބްދުﷲ ޔާމީން އަބްދުލްގައްޔޫމް ސަރުކާރަށް ވަރުުގަދަ ސުވާލެއް އަމާޒުކުރައްވައިފިއެވެ.

ރައީސް ޔާމީން މިފަދައިން ވިދާޅުވީ ޕީއެންއެފްގެ ފަރާތުން 20 ވަނަ ރައްޔިތުންގެ މަޖިލީހަށް ކުރިމަތިލައްވާ ކެންޑިޑޭޓުންގެ ސިޔާސަތު ހުށަހެޅުމަށްޓަކައި ސިލްސިލާގޮތެއްގައި ކުރިޔަށް ގެންދާ ޖަލްސާތަކުގެ ތެރެއިން ބުރާސްފަތިދުވަހުގެ ރޭ ބޭއްވުނު ޖަލްސާގައި ވާހަކަދައްކަވަމުންނެވެ.

މި ސަރުކާރަކީ އެމަނިކުފާނުގެ ބޮޑެތި ގުރުބާނީތަކެއް ވެގެން ގެނައި ސަރުކާރެއް ކަމުން އެހާ ބޮޑު ގާނޫނީ ހުރަހެއް އޮވެގެން ނުވަތަ އެހާ ބޮޑު ބަޔަކު ކުށްވެރިކުރާ ކަމަކަށް ވާނެތޯ މި ސަރުކާރުން އެމަނިކުފާނު ޓީވީ އިންޓަވިއުތައް ދިނުމާއި ޕޯޑިއަމްތަކުގައި ވާހަކަދެއްކުން އެއީ ވިދާޅުވެ، ރައީސް ޔާމީން ވަނީ ސުވާލު އުފައްދަވާފައެވެ.

ރައީސް ޔާމީން ވަނީ މި ސަރުކާރުން އެމަނިކުފާނަށް އެއްވެސް ލުއިތަކެއް ދެއްވާފައިނުވާތީ ވަރަށް ގިނަ ގުނަ ސުވާލުތަކެއް އަމާޒުކުރައްވާފައެވެ.

ރައީސް ޔާމީނަށް ލުއި ތަކެއް ދެއްވާފައިވަނީ ނިމިދިޔަ ރައީސް އިބްރާހިމް މުހައްމަދު ޞާލިހްގެ ސަރުކާރުންނެވެ.

މި ސަރުކާރުން އެމަނިކުފާނަށް އެއްވެސް ލުއިތަކެއްދެއްވާނެ ތޯ ނޫސްވެރިން ހޯމްލޭންޑް މިނިސްޓަރ އިހްސާން ގާތު އެހުމުން އިހްސާން ވިދާޅުވީ ވަކި މީހަކަށް ވަކި ގޮތެއް ނުހެއްދެވޭނެކަމަށެވެ.

ނަމަވެސް އަދުގެ ސަރުކާރުން ވެރިކަމަށް އައީ ރައީސް ޔާމީންގެ ހުސްގޮނޑިއާއި ފޮޓޯ ޖަހައިގެން އެމަނިކުފާނު މިނިވަންކުރައްވާނެކަމަށް ވައުދުވެވަޑައިގަތުމަށްފަހުގައި ކަންވެސް ފާހަގަކޮށްލެވެއެވެ.