ރައީސް ޑރ މުހައްމަދު މުއިއްޒުގެ ސަރުކާރުން ކައިރި ކައިރީގައި އެއާޕޯޓުތައް އަޅަން ނިންމާ އިއުލާންކޮށް އަދި އިފްތިތާހުވެސް ކުރަމުންދާ ދަނޑިވަޅެއްގައި ކުރީގެ ރައީސް މުހައްމަދު ނަޝީދުގެ ފާޑުވިދާޅުވުން އެކަމަށް އަމާޒުވެއްޖެއެވެ.

ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އެއާޕޯޓުތައް އަޅަނީ މާލީ ގޮތުން ދެކޮޅު ނުޖެހޭ ގޮތަކަށް ކަމަށާ، ދައްކައި ދެނީ ޒިންމާދާރުކަން ކުޑަކޮށް ކަމަށެވެ.

އެގޮތުން ނަޝީދު ވިދާޅުވީ، ކައިރިކައިރީގައި އެއާޕޯޓްތައް އެޅުމުގެ ނަތީޖާއަކަށް ވާނީ ރާއްޖޭގެ ގައުމީ އެއާލައިނަށް "ދެއުޅިއެއް ނުވާ" ހަރަދުތަކެއް ހިންގަން ޖެހުން ކަމަށެވެ.

އުތުރުގައި އިތުރު ހަތަރު އެއާޕޯޓު އޮއްވައި، އިތުރު ހަތަރު އެއާޕޯޓު އަޅަނީ 19-36 މިނެޓާ ދޭތެރޭގައި ލޯންޗެއްގައި ދެވޭހާ ކައިރީގައި ކަމަށެވެ. އޭގެ ސަބަބުން ހުރިހާ އެއާޕޯޓެއްގައި ވެސް އިގްތިސާދީ ނުވަތަ މާލީ ދެކޮޅު ޖެހުމެއް ނޯންނާނެ ކަމަށް ނަޝީދު ވިދާޅުވިއެވެ.

އެމަނިކުފާނު ވިދާޅުވީ އެކަމުގެ ސަބަބުން ގައުމީ އެއާލައިނަށް ވެސް ދެއުޅިއެއް ނުވާ ހަރަދުތަކެއް ކުރަން ޖެހުމުގެ އިތުރުން ލޯކަލް ޓޫރިޒަމްގައި ލިބެންޖެހޭ މަންފާތައް ވެސް ނުލިބޭނެ ކަމަށެވެ.

ކައިރިކައިރީގައި އެއާޕޯޓަކަށްފަހު އެއާޕޯޓެއް އަޅަމުން ދިއުމުން ފެންނާނީ ދަތުރުފަތުރުގެ ގުޅިފައިވާ ނިޒާމެެއްގެ އަމާޒާއި ޕްލޭނެއް ނެތުމާއި ޒިންމާދާރުކަން ކުޑަކަން ކަމަށް ވެސް ނަޝީދު ވިދާޅުވިއެވެ.

ރައީސް ނަޝީދު މިފަދައިން ވިދާޅުވެފައިވާއިރު، މި ސަރުކާރުގެ އަމާޒަކީ، މީހުން ދިރިއުޅޭ ކޮންމެ ރަށަކުން ވެސް 30 މިނެޓުތެރޭ ދެވޭ ހިސާބުގައި އެއާޕޯޓެއް އޮތުން ކަށަވަރު ކުރުމެވެ. އެގޮތުން ރައީސް ރަށްރަށަށް ކުރައްވަމުން ގެންދަވާ ދަތުރުފުޅުތަކުގެ ތެރެއިން، ބައެއް ރަށްރަށުގައި އައު އެއާޕޯޓުތައް އެޅުމުގެ މަސައްކަތްތައް ފައްޓަވައި ދެއްވައި އެ މަސައްކަތަށް ނަގާނެ މުއްދަތު އިއުލާންކުރައްވައެވެ.

ރައީސް މިހާރު ގެންދަވަނީ ށ. އަތޮޅުގެ ރަށްތަކަށް ދަތުރުކުރައްވަމުންނެވެ. އެ ދަތުރުފުޅުގެ ތެރެއިން އެ މަނިކުފާނު ވަނީ، އެ އަތޮޅު މިލަންދޫ، ބިލެތްފެހި އަދި ކޮމަންޑޫގައި އެއާޕޯޓުތައް އެޅުމުގެ މަސައްކަތް ފަށްޓަވައިދެއްވައިފައެވެ. އެ އަތޮޅު ފުނަދޫގައި މިހާރު އެއާޕޯޓެއް އޮވެއެވެ.