ލޭންޑިން ކްރާފްޓު ބަންޑުން ޖަހާލާ ގެއްލުނު ތިން ވަނަ މީހާގެ ހަށިގަނޑު، އޮޔާ ދަނިކޮށް ފެނިއްޖެއެވެ.

އެމްއެޑީއެފުން ހާމަކުރި ގޮތުގައި މިދިޔަ ބުދަ ދުވަހުގެ ރޭ ދަންވަރު މާލެއިން ފުރައިގެން ކ. އެރިޔަދޫއަށް ދަތުރުކުރަނިކޮށް ބަންޑުން ޖަހާލި "އަލްމާކް ފިޔަ" ކޮޅުވެއްޓިން ގެއްލުނު ތިން މީހުންގެ ތެރެއިން އެންމެ ފަހު މީހާގެ ހަށިގަނޑު މާލެ އަތޮޅު އާއިލާފުށްޓާއި ވިލާ ނޮޓިކާއާ ދެ ރަށް ދޭތެރެއިން އޮޔާދަނިކޮށް ރޭގެ ވަގުތެއްގައި ފެނިފައިވާ ކަމަށެވެ.

ފުލުހުން މީގެ ކުރިން ބުނެފައިވާ ގޮތުގައި އެ ކޮޅުވެއްޓި ބަންޑުން ޖަހާލާ ގެއްލުނު ތިން މީހުންގެ ތެރެއިން ދެ މީހުންނަކީ ބިދޭސީން ކަމަށާ އެކަކީ ދިވެއްސެއް ކަމަށެވެ. އެއީ ސްރީލަންކާގެ ރައްޔިތަކާ އިންޑިއާގެ ރައްޔިތެއްގެ އިތުރުން ދިވެހި މިހާއެވެ. ކޮޅުވެއްޓި ބަންޑުން ޖަހާލި ހާދިސާއަށް ފަހު ފަހު ދުވަހު ދެ މީހުންގެ ހަށިގަނޑު ފެނިފައިވާއިރު އޭގެ ތެރެއިން ސްރީލަންކާއަށް ނިސްބަތްވާ މިހާގެ ހަށިގަނޑު ހޯދަން ދުވަސްތަކެއް ހޭދަވިއެވެ.

ޖުމުލަ ހަތް މީހުންނާ އެކު، ދަތުރުކުރަނިކޮށް ބަންޑުން ޖަހާލި "އަލްމާކް ފިޔަ" ކިޔާ ކޮޅުވެއްޓިން ދަތުރުކުރި ހަތަރު މީހުން ވަނީ ފުރަތަމަ ސަލާމަތްކޮށްފައެވެ. ތިން މީހުން ގެއްލުނުއިރު، އޭގެ ތެރެއިން ދެ މީހުން ފެނުނީ މަރުވެފައި އޮއްވައި ކަނޑު އަޑިންނެވެ.

އެއީ، ގއ. ދާންދޫ، ސަރުސޫނުގެ، 38 އަހަރުގެ އަހުމަދު ޝިފާނާއި އިންޑިއާއަށް ނިސްބަތްވާ ބިދޭސީއެކެވެ.