ރައްޔިތުން ނުކުމެ މުއިއްޒު އަޒުލުކުރަންޖެހޭ ހިސާބަށް މުއިއްޒުގެ އަމަލުތައް ގޮސްފައިވާ ކަމަށް ކުރީގެ ނައިބު ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ރޭ ކުރިއަށް ގެންދިޔަ ޕީއެންއެފްގެ ޓައުން ހޯލް ޖަލްސާގައި ވާހަކަދައްކަވަމުން ޑރ ޖަމީލް ވިދާޅުވީ ދުނިޔޭގެ ޑިމޮކްރަސީތަކުގައި އަދި ޚާއްސަކޮށް ރައްޔިތުންގެ ބާރު އޮންނަ ރައްޔިތުންގެ ވެރިކަންތަކުގައި ވެރިއަކަށް ރައްޔިތުން އައްޔަނުކުރާ ބޭފުޅާއަށް ހިތުހުރިހާ ގޮތަކަށް ކަންތައްތައް ނުކުރެވޭނެ ކަމަށެވެ.

ރައްޔިތުންގެ ވެރިކަމޭ މި ކިޔެނީ އެހެންވެގެން ކަމަށާއި ދެ އަހަރުވެގެން ދާ މުއިއްޒުގެ ވެރިކަމުގައި މިހާރު ރާއްޖެއަށް ދިމާވެފައިވާ ކަންތައްތައް ތަހުޒީބީ މުޖުތަމައުތަކުން ރައްޔިތުން ނުކުމެ އެ ވެރިއެއް އަޒުލުކުރައްވާނެ ކަމަށް ޑރ ޖަމީލް ފާހަގަކުރެއްވިއެވެ.

މީގެ އިތުރުން މިފަދަ ވެރިކަމެއް ނިންމުމަށްޓަކައި ރައްޔިތުން ކުރަން ޖެހުނު ކޮންމެ ކަމެއް ކުރުމަށް ދުނިޔޭގެ ތަހުޒީބީ ގައުމުތަކުގެ ރައްޔިތުން ފަސްނުޖެހޭނެ ކަމަށާއި އެހިސާބަށް މިގައުމުގެ ރައީސް މުއިއްޒުގެ އަމަލުތައް ގޮސްފައިވާ ކަމަށް ޑރ ޖަމީލްގެ ވާހަކައިގައި ފާހަގަކުރެއްވިއެވެ.

ދުނިޔޭގެ ފެންނަން ހުރި ހުރިހާ ހިސާބަކަށް ބެލިކަމުގައިވިޔަސް މީގެ މިސާލު ފެންނާނެ ކަމަށާއި ވެރިއަކަށް ދުސްތޫރީ އިމުން ނުވަތަ ގާނޫނީ އިމުން ބޭރުން ކަންތައްތައް ކުރުން ބާރު ލިބިގެން ނުވާ ކަމަށް ޑރ. ޖަމީލް ސިފަކުރެއްވިއެވެ.

މިގޮތުން، ދުނިޔޭގެ އެންމެ ބޮޑު މޮނާކް ނުވަތަ ރަސްކަން ކުރައްވާ އިނގިރޭސިވިލާތުގެ ރަސްކަމުންވެސް މިފަދަ މިސާލުތައް ފެނިގެން ދާކަމަށް ޑރ ޖަމީލް ސިފަކުރެއްވިއެވެ.

މިއާއިއެކު މުއިއްޒު އިސްވެހުރެ ހިންގަމުންދާ ކޮރަޕްޝަނާއި ރިޝްވަތުގެ ވާހަކަތައް ނޫސްތަކުގެ ފަލަ ސުރުޚީއަށް ހުއްޓުމެއްނެތި އަރަމުންދާއިރު މިފަދަ މައްސަލަތައް ނުބަލާ އޮއްބާލަމުންދާ ކަމަށްވެސް އެމަނިކުފާނު ފާހަގަކުރެއްވިއެވެ.