ކުރިޔަށް މިއޮތީ 20 ވަނަ ރައްޔިތުންގެ މަޖިލިސް އިންތިޚާބެވެ. ކުޅި ސަމާ އަދި ރަނގަޅަށް ނުފެށި އުޅެނިކޮށް ތުންތުން މަތިން އަޑުތައް އިވެންފަށައިފިއެވެ. ސަހަރޯއޭ ހިތަށްއެރިއެވެ. އެއްކަލަ ކުރީގެ ވެރިޔާ ނަމުން ހަމަ ޞާލިހެވެ. ކަމުން ޖާހިލޭ ނުބުނެވޭ ވަރެއްވެސް ނޫނެވެ. ކެމްޕެއިންގައި އުޅުއްވާ ވީޑިޔޯތަކާއި ފޮޓޯތައް ކޮންމެ ދުވަހަކުވެސް ފެނެއެވެ. ޕޯޑިއަމް ތަކަށް ކެންޑިޑޭޓުންގެ ތައުރީފްކުރުމަށް އަރައި ހުރެ މި ދައްކަވަނީ ހުސް ބޯގޯސް ވާހަކައެވެ.

މަޖިލިސް އިންތިޚާބް ބޯމަތިވެފައި އޮތުމުން ޓާގެޓް ކަނޑައަޅައި މަޖިލީހުގެ މެޖޯރިޓީ ހޯދުމަށް ހީވަނީ ދެންމެ ދެންމެ ގަހަށް އަރައި އެބުނާ މެޖޯރިޓީ އެއް ބިނދެލީއެވެ. އެއްދުވަހަކު ޕޯޑިއަމެއްގައި ހުއްޓި އެބޭފުޅާ ދެއްކެވި ވާހަކައަށް ނަޒަރު ހިންގާލީމެވެ. ދެ ކަންފަތް ހުޅުވާލާ ރަނގަޅަށް އަޑުއަހާލީމެވެ. ރައީސް އަބްދުﷲ ޔާމީން އަބްދުލްގައްޔޫމްގެ އިސްތިއުނާފް މައްސަލަ ހައި ކޯޓްގައި ތާވަލްނުކުރެވި ލަސްވަމުން ދަނީ އޭގައި ކޮންމެވެސް ވަރަކަށް ނުފޫޒު އެކުލެވޭތީ އޭ ވިދާޅުވެ ވަށް ބަހުން އަދުގެ ސަރުކާރަށް ގާކޮޅެއް އެއްލާލައިފިއެވެ. ހިތާހިތުން ކިޔާލެވުނެވެ. "މި ބޭފުޅާ ވިދާޅުވީ ކީކޭތޯއޭ". ރައީސް ޔާމީން ގެ މައްސަލައަށް ނުފޫޒު ފޯރުވަނީއޭ ކިޔާފައި އަނގަ ފުޅާކުރާކަށް މިއަދު ރައީސް ޞާލިހް ހަމަ ލަދުގެ ކަންފުޅެއްވެސް ނުގަންނަނީތާއެވެ. ރައީސް ޞާލިހްގެ ވެރިކަމުގައި ރައީސް ޔާމިންގެ މައްސަަލަ ނުނިމި އޮތީ ނުފޫޒު ނުފޯރުވީމަތޯ؟

އެމްޑީޕީގެ މެޖޯރިޓީ މަޖިލީހަށް ހޯދުމަށްޓަކައި ހަމަ ރައީސް ޔާމީންގެ ނަންފުޅު ނުލައި ނުހުރެވުނީތާއެވެ.

ދެން ހުންނަ ވެރިޔާގެ ވާހަކަވެސް ދައްކާލުން މުހިންމެވެ. އިންތިޚާބް ބޯމަތިވީމަ މުސްކުޅިން ބުނާހެން ތަނެެއްގައި ރޯވީމާ އުޅޭ ފާޑަށް އުޅުއްވާ މަންޒަރު ފެނެއެވެ. ރަށްރަށަށް ވަޑައިގެން ކެމްޕެއިން ކުރައްވާއިރު ސަރުކާރުގެ ކެންޑިޑޭޓަށް ވޯޓު ދިނީމާ އޭ ކަންކަން އިސްލާހް ވާނީ ވިދާޅުވެއެވެ. ހަމަ އެބާރުމިނުގައި ރައީސް ޔާމީންގެ ނަންފުޅު އެބަ ފާހަގަކުރައްވައެވެ. އެގޮތުން އެމަނިކުފާނު މިނިވަންކުރެވޭނީ މަޖިލިސް މެޖޯރިޓީ ސަރުކާރަށް ލިބިގެންނޭ ކިޔާފަ ކޮންމެވެސް ދެކޮޅު ނުޖެހޭ ވާހަކަތަކެއް އެބަ ދައްކަވައެވެ.

ރައީސް ޞާލިހް ބޭނުންވަނީ އެމްޑީޕީއަށް މަޖިލިސް މެޖޯރިޓީ ހޯދައިދޭން.. ރައީސް މުއިއްޒު ބޭނުންފުޅުވެލައްވަނީ ސަރުކާރަށް މެޖޯރިޓީ ހޯދައިދޭން.. މި ވެރިން ހީވަނީ އެކަކު އަނެއްކަކުގެ ބޮލަށް އަރައިގެން ކުޑަކުދިންހެން ތަޅާ ފޮޅާހެންނެވެ. ތަފާތެއް ނެތީތާއެވެ.

ޕީއެޗްޑީ ހޯލްޑާރ އަކަސް ނުކިޔަވާ ހުރި ފަރާތަކަސް އަމަލުތައް މިހުންނެވީ ތާކުން ތާކުން ނުޖެހޭ ގޮތަކަށްތާއެވެ.

ދަންނަވަންތޯއެވެ. ރައީސް ޔާމިނެއް މެޖޯރިޓީ ހޯދާކަށް ރައީސް ޞާލިހެކޭ ނުވަތަ ރައީސް މުއިއްޒެކޭ ވިދާޅެއްނުވާނެއެވެ.

ދެގެރި ތަޅަންޏާ ކަށްގަލަށް ބާރުކުރާނޭ ބުނީމާ ނޭނގުނަސް އޭގެ މާނައަކީ ހުރިހާ ދެރައެއް ވާނީ ރައްޔިތުންނަށެވެ. ރައްޔިތުންނަށް ހެޔޮ އެދޭނަމަ ތިހެންނެއް ނުއުޅުއްވާނެކަން ޔަގީނެވެ.