އެންމެންވެސް ތިބެނީ ޒާތީ ތަޢައްސުބުގެ ތެރޭގައި ތާށިވެފައި ކަމަށް ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ބޭއްވުނު ޕީއެންއެފްގެ ޓައުން ހޯލް ޖަލްސާގައި ޑރ. ޖަމީލް ވިދާޅުވެފައި ވަނީ ޕީއެންއެފްގެ މެމްބަރުންގެ އިހްތިރާމު އެހެން ހުރިހާ ޕާޓީއެއްގެ އާންމު މެންބަރުންނަށްވެސް އެބްއޮތްކަމަށެވެ. އަދި އެއްވެސް ޒާތީކަމެއް ނެތްކަމަށެވެ.
މި ސަރުކާރުން ސިޔާސީ މީހުން ޖަލަށް ނުލާ ކަމަށް ސަރުކާރުގެ ބޮޓުން އިޝްތިހާރުކުރަމުން އަންނައިރު އެކަން ދޮގުކުރައްވާ، ނިމިދިޔަ ސަރުކާރުގައިވެސް ކަންކުރި ގޮތް ހަނދާނަށް ގެންނަވަމުން ޑރ ޖަމީލު ވިދާޅުވީ، ޒާތީކަމެއް ނެތްކަމުގައި ވީނަމަވެސް ރާއްޖޭގައި ވަކީލުންނާއި އެހެނިހެން މަގާމުތަކުގައި ތިބި ބޭފުޅުންނަށްވެސް ހައްގު ބަސް ނުބުނެވޭ ކަން އެއީ ފެންނަން އޮތް ހަގީގަތެއް ކަމަށެވެ.
"ވަރަށް ގިނަ މީހުން ތިމަންނަމެންނަކީ މިނިވަނުންނޭ ތިމަންނަމެން ވަރަށް އިންޑިޕެންޑެންޓޭ، ތިމަންނަމެންނަކީ ވަރަށް ހަމަހަމަގޮތެއްގަ ކަންތައްތައް ކުރާމީހުންގެ ލޭބަލް ޖަހައިގެން ތިއްބަކަސް ކޮންމެ މީހަކުވެސް ހުންނަނީ ކޮންމެވެސް ޒާތީ ތަޢައްސުބުގެ ތެރޭގައި ތާށިވެފައި"
ޑރ. ޖަމީލް
އިތުރަށް ޑރ. ޖަމީލް ވިދާޅުވީ މައުޟޫއަށް އަދުލުވެރިކޮށް ވާހަކަދެއްކުމަކީ ވަރަށް މުހިއްމު ކަމެއްކަމަށެވެ. އަދީ ތާރީހު ލިޔާއިރު ތެދަށް ކަންއޮތް ގޮތަށް ލިޔުމުގެ މުހިއްމުކަމަށްވެސް ޑރ. ޖަމީލުގެ ވާހަކަފުޅުގައި ވަނީ އަލިއަޅުވާލައްވާފައިއެވެ.
