ޒާކިރު ނައިކު މި މަހު ބަންގްލަދޭޝަށް ވަޑައިގެންފިނަމަ ހައްޔަރުކުރުމަށް އިންޑިއާގެ މޯދީ ސަރުކާރުން އެދިެއްޖެއެވެ.

އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާން ރަންދީރު ޖައިސްވާލް ވިދާޅުވީ ޒާކިރު ނައިކަކީ ފިލައިގެން އުޅޭ މީހެއް ކަމަށެވެ. އެހެންކަމުން އޭނާ ހައްޔަރުކުރުމަށް ބަންގްލަދޭޝް ސަރުކާރަށް އަންގާފައިވާކަމަށް އޭނާ ވިދާޅުވިއެވެ.

ނައިކް ޑާކާއަށް ވަޑައިގަންނަވާނީ ނޮވެމްބަރު 28 އަދި 29 ވަނަ ދުވަހު ވެރިރަށް އަގަރްގާން ސަރަހައްދުގައި ބާއްވާ އިވެންޓެއްގައި ބައިވެރިވެވަޑައިގަތުމަށެވެ.

ނަރެންދުރަ މޯދީގެ ވެރިކަމުގައި އޭނާގެ މައްޗަށް ނަފްރަތު އުފެއްދުމާއި މަނީ ލޯންޑަރިންގެ ތުހުމަތުކުރުމުން, 2016 ވަނަ އަހަރު ޒާކިރު ނައިކް ވަނީ އިންޑިއާ ދޫކޮށް ގޮސްފަ އެވެ.

އަދި ހަމަ އެ އަހަރު އޭނާގެ ޓީވީ ޗެނަލް "ޕީސް ޓީވީ" ވެސް ވަނީ ބަންދުކޮށްފަ އެވެ. އޭގެ ފަހުން ނައިކް ވަނީ މެލޭޝިއާގައި ދާއިމީ ރަށްވެހިކަން ލިބިވަޑައިގެންފަ އެވެ.

އަދި އެނބުރި އިންޑިއާއަށް ނުދާނެ ކަމަށް ތަކުރާރުކޮށް ވިދާޅުވަމުން ގެންދަވަ އެވެ.