ރައީސް މުހައްމަދު މުއިއްޒު ފުވައްމުލަކަށް މިހާރު ކުރައްވަމުންދާ ދަތުރުގައި އެ ސިޓީގެ ރައްޔިތުންނާއި ބައްދަލުކޮށް ބޭއްވި ޖަލްސާގައި ފުވައްމުލަކު މޭޔަރަށް ވާހަކަ ދެއްކުމުގެ ފުރުސަތު ނުދެއްވި މައްސަލައަށް ޕީއެންއެފްގެ ނައިބު ރައީސް ޑރ މުހައްމަދު ޖަމީލް އަހްމަދު ފާޑުވިދާޅުވެއްޖެއެވެ.
މިގޮތުން ޑރ ޖަމީލް އެކްސްގައި ކުރެއްވި ޕޯސްޓެއްގައި ވަނީ މުއިއްޒާއި ޚިޔާލު ތަފާތުވާ ފަރާތްތައް ބާކީކޮށްގެން ކިހާ ދުވަހެއް ވަންދެން ހިފަހައްޓާލެވޭނެތޯ އައްސަވާފައެވެ.
މައުލޫމާތު ލިބިފައިވާ ގޮތުގައި މި ޖަލްސާގައި ކުރިން މޭޔަރު ވާހަކަ ދައްކަވާ ގޮތަށް އޮތް ނަމަވެސް ވަގުތު ސަލާމަތް ކުރަން ކަމަށް ބުނެ ޖަލްސާގައި ވާހަކަ ދެއްކުމުގެ ފުރުސަތު ނުދޭ ގޮތަށް ނިންމާ ޖަލްސާ ނިންމާފައިވެއެވެ.
ޑރ ޖަމީލްގެ ޕޯސްޓްގައި އިތުރަށް ވިދާޅުވީ ޑިމޮކްރަސީތަކުގައި އިންތިޚާބުވަނީ އެންމެ ފަރާތެއް ނޫން ކަމަށާއި ރައީސް މުއިއްޒުވެސް އިންތިޚާބުވި ފަދައިން ފުވައްމުލަކު މޭޔަރަކީ އެ ރަށު ރައްޔިތުން ވޯޓު ދީގެން އިންތިޚާބުވެފައިވާ ފަރާތަކަށްވާއިރު އެކަމަށް މުއިއްޒުވެސް އިހުތިރާމް ކުރައްވަން ޖެހޭނެ ކަމަށެވެ.
މީގެ އިތުރުން، ދުނިޔޭގެ އެންމެ ވަރުގަދަ ބާރު ކަމަށް ދައުވާ ކުރާ އެމެރިކާގެ ރައީސް ޓްރަމްޕްގެ އިންޒާރުތަކާއި އެކުވެސް ނިއުޔޯކްގެ މޭޔަރަކަށް މުސްލިމް ޒުވާން މަމްދާނީ އިންތިޚާބުވެފައިވާ ކަން ފާހަގަކުރައްވާ ޖަމީލް ވިދާޅުވީ މިކަމުން މުއިއްޒު ފިލާވަޅު ނަގަން ޖެހޭ ކަމަށެވެ.
ފުވައްމުލަކު މޭޔަރު އިސްމާއީލް ރަފީގަކީ ކިޔަވައިގެން ހުރި، ޒުވާން ފުވައްމުލަކު ރައްޔިތުންގެ މެޖޯރިޓީން އިންތިޚާބުވެފައި ހުރި ފަރާތެއް ކަމަށާއި އެކަން މުއިއްޒަށް ހަޖަމް ނުވުމަކީ މުއިއްޒުގެ ތަޞައްރަފު ނުފުދޭކަން ދޭހަވާ ދަލީލެއް ކަމަށް ބުނެ ޖަމީލް ވަނީ ވަރަށް ބޮޑަށް ފާޑުވިދާޅުވެފައެވެ.
