ސ. ހުޅުދޫ ގައި ރައީސް މުހައްމަދު މުއިއްޒުގެ ސެކިއުރިޓީ ވެހިކަލް އަކުން ޖެހި ނުރައްކާތެރި އެކްސިޑެންޓެއް ހިނގައިފި އެވެ.

މައުލޫމާތު ލިބުނުގޮތުގައި ބުދަ ދުވަހު މެންދުރު ހިނގި އެކްސިޑެންޓްގައި އަނިޔާ ލިބިފައިވަނީ ދެމަފިރިއަކަށެވެ.

މި އެކްސިޑެންޓް ހިނގީ ރައީސް ޑރ.މުހައްމަދު މުއިއްޒުގެ ސެކިއުރިޓީ ވެހިކަލް އާއި އެ ދެ މަފިރިން ދުއްވި ސައިކަލު ޖެހިގެންނެވެ. ކޮންމެވެސް ވަރެއްގެ އަނިޔާތަކެއް އަންހެން މީހާއަށް ލިބިފައިވާ ކަމަށް މައުލޫމާތު ލިބިފައިވެއެވެ.

އެ އަންހެން މީހާ އަށް ފަރުވާ ދިނުމަށް ހުޅުދޫގެ ސިއްހީ މަރުކަޒަށް ގެންދިޔަ ކަމަށާއި، ނަމަވެސް އެކްސްރޭ ނުނެގޭތީވެ، އައްޑޫ އިކުއިޓޯރިއަލް ހޮސްޕިޓަލަށް ގެންގޮސްފައިވާ ކަަމަށް ވަނީ މައުލޫމާތު ލިބިފައެވެ. އަދި ފިރިހެން މީހާއަށް އަނިޔާއެއް ވެފައި ނުވެއެވެ.

މި އެކްސިޑެންޓްގެ ސަބަބުން ސެކިއުރިޓީ ވެހިކަލްގެ އިތުރުން ސައިކަލަށް ވެސް ގެއްލުންތަކެއް ވަނީ ލިބިފައެވެ.