ނިއުޓްރޮލިން ބީ ސިރަޕް އަދި ކެޕްސޫލް ރާއްޖެއަށް ނުލިބޭތާ އަހަރެއް ވެއްޖެ އެވެ.

މިއީ ބޭރަށް ހިންގުމާއި ހޮޑުލުން ހުއްޓުވަން ހާއްސަކޮށްގެން ދޭ ބޭހެކެވެ. އެކަމަކު މި ބޭސް ރާއްޖޭގެ ފާމަސީ ތަކުން ނުލިބޭތީ އާންމުން ގެންދަނީ އެކަން ފާހަގަކޮށް ކަންބޮޑުވުން ފާޅުކުރަމުންނެވެ.

ބައެއް ފާމަސިސްޓުން ބުނީ ފާމަސީތަކަށް ނިއުޓްރޮލިން ބީ ސިރަޕް ނުލިބޭތާ އަށެއްކަ މަސް އަދި ކެޕްސޫލް ނުލިބޭތާ ގާތްގަނޑަކަށް އަހަރެއް ވެފައިވާ ކަމަށެވެ.

ބޭސް ފިހާރައެއްގައި ހިންގާ މީހަކު މައުލޫމާތު ދެމުން ބުނީ އެ ބޭސް ގެންނަން ލިސްޓްގައި ހިމެނި ނަމަވެސް އެއްގޮތަކަށްވެސް އެ ބޭސް ލިބޭ ގޮތް ނުވި ކަމަށެވެ.

އެ ބޭސް ނުލިބޭ ސީދާ ސަބަބެއް ސާފު ނުވާ ކަމަށްވެސް އެ ފަރާތްތަކުން ވަނީ ބުނެފައެވެ.

މޯލްޑިވްސް ފުޑް އެންޑް ޑްރަގު އޮތޯރިޓީގެ އޮފިޝަލަކު ވިދާޅުވީ ނިއުޓްރޮލިން ބީ ސިރަޕް އަދި ކެޕްސޫލް ގެނައުން މަނާކޮށްފައި ނުވާނެ ކަމަށެވެ. އެކަމަކު އެ ބޭސް މާލެ އިން ގަންނަން ނުލިބޭ ކަމުގެ ޝަކުވާ އެ އިދާރާއަށް ވެސް ލިބެމުންދާ ކަމަށް ވިދާޅުވި އެވެ.