އެ ހޮސްޕިޓަލުގައި ފަރުވާ ދެމުން ދަނިކޮށް އެންމެ 8 މަހުގެ ޔޫނުސް ހުސެިން އަބްދުﷲ ނިޔާވީ ހޮސްޕިޓަލުގެ އިހުމާލުތަކެއްގެ ތެރެއިން ކަމަށް ގަބޫލުކޮށް އިންދިރާ ގާންދީ މެމޯރިއަލް ހޮސްޕިޓަލުން ތުއްތު ކުއްޖާގެ އާއިލާގެ ފަރާތުން މައާފަށް އެދެފިއެވެ.
މިދިޔަ ޖުލައި މަހު 28ގައި ޔޫނުސް އައިޖީއެމްއެޗުގައި އެޑްމިޓުކޯށް ފަރުވާ ދެމުން ދިޔައީ ގަދަ ހުމެއް އަންނަމުންދިއުމުގެ ސަބަބުންނެވެ. ނަމަވެސް ޔޫނުސްއަށް އެކަށީގެން ފަރުވާއާ އަދި ބަލި ދެނަގުތުމަށް ހަދަން ޖެހޭ ތަހުލީލުތައް ނުހަދާ ހޮސްޕިޓަލުން ލަސްކޮށް ކުއްޖާގެ ފުރާނަ ދިއުމުގައި ހޮސްޕިޓަލުގެ އިހުމާލުތަކެއް ވާކަމަށް އޭރު އާއިލާއިން ތުހުމަތުކޮށްފައިވެސް ވެއެވެ.
އެގޮތުން ޔޫނުސްގެ ޢާއިލާއިން މީގެ ކުރިން ބުނެފައިވަނީ، ތުއްތު ކުއްޖާ ހޮސްޕިޓަލަށް ގެންދިޔައީ ރޯގާ ޖެހިގެން ފަރުވާ ހޯދުމަށް ކަމަށާއި، ނަމަވެސް ހޮސްޕިޓަލުން ދީފައިވާ ފަރުވާގެ ސަބަބުން "ލިވާ އެންޒައިމް މަތިވެގެން" ކުއްޖާގެ ހަށިގަނޑު ދުޅަވެފައިވާ ކަމަށެވެ.
ހަމައެހެންމެ ކުއްޖާ ހޮސްޕިޓަލުގައި އެޑްމިޓުކޮށް ފަސް ދުވަސް ފާއިތުވެގެން ދިޔައިރުވެސް ކުޑަކުދިންގެ ހާއްސަ ޑޮކްޓަރަކު ކުއްޖާ ނުބަލާ ކަމަށާއި، ލިވަރު ފެއިލްވުމުން ބޭރަށް ރިފަރ ކުރުމަށް އެދުނުއިރު އާސަންދަ ހަމަޖެހުމުގެ މައްސަލަތައް ކުރިމަތިވެފައިވާ ކަމަށް ވެސް އއާއިލާއިން ބުނެފައިވެއެވެ. އަދި ކުއްޖާ ނިޔާވިފަހުން ކުއްޖާއަށް ސީޕީއާރު ދިނުމުން ކުއްޖާގެ ކަންފަތާއި ނޭފަތުން ލޭ އައިސްފައިވާ ކަމަށްވެސް ބުނެފައިވެއެވެ.
ނަމަވެސް އޭރު އައިޖީއެމްއެޗުން ހޮސްޕިޓަލުގައި ދިފާއުގައި ބުނެފައިވަނީ ޔޫސްފުގެ ބޭސްފަރުވާގައި އެއްވެސް އިހުމާލެއް ނުވާ ކަމަށާ ކަންކަން ހިނގާ ދިޔައީ ތަރުތީބުގެ މަގުން ކަމަށެވެ. އޭގެ 5 މަސް ފަހުން ހޮސްޕިޓަލުން ވަނީ އެ ހޮސްޕިޓަލުގެ އިހުމާލު އެ މަރު ދިމާވުމުގައި އޮތްކަން ހާމަކޮށް އެ ކަމަށް މައާފަށް އެދި އާއިލާއަށް ޑިސެމްބަރު މަހުގެ 31 ވަނަ ދުވަހު 3 ސަފްޙާގެ ސިޓީއެއް ފޮނުވާފައެވެ.
އެ ސިޓީގައި ހޮސްޕިޓަލުގެ ފަރާތުން ހާމަކޮށްފައިވާ ގޮތުގައި، ބަލި މީހެއްގެ ބަލީގެ ހާލަތާމެދު ހަދާ ޓެސްޓުތަކުގެ ނަތީޖާއާއި ފަރުވާ ކުރިއަށްދާ ގޮތަކީ، އެކަށީގެންވާ އަވަސްމިނުގައި ބަލި މީހާ ނުވަތަ އާއިލާއާ ހިއްސާކުރެވެން ވާނެ މަޢުލޫމާތު ކަމަށް ޤަބޫލު ކުރާ ކަމަށާ ހޮސްޕިޓަލުގައި ފަރުވާ ދެމުން ދަނިކޮށް، ޔޫނުސް މަރުވެފައިވާތީ، އެކަމަށް ނިހާޔަތަށް މައާފަށް އެދޭ ކަމަށެވެ.
މީގެ އިތުރުން ސަރުކާރު ބަންދު ދުވަސްތަކެއް ނަމަވެސް، އެޑުމިޓުކޮށްފައިވާ ބަލި މީހެއްގެ ސްކޭނު ލަސްވެގެން ނުވާނެ ކަމަށް ގަބޫލުކުރާ ކަމަށާއި، އެފަދަ ކަންކަން ތަކުރާރު ވިޔަ ނުދިނުމަށް ހަރުދަނާ ފިޔަވަޅުތައް އަޅާނެކަމަށް ބުނެ ހޮސްޕިޓަލުން ދިފާއުގައި ބުނެފައިވަނީ ބަލީގެ ސީރިއަސްކަން އަވަހަށް ދެނެގަތުމަށް ޑޮކްޓަރުންނަށް އުނދަގޫވީ، އާންމު ވައިރަލް ހުމެއްގައި ހުންނާނެ ފަދަ އަލާމާތްތައް ޔޫނުސްގެ ކިބައިން ފެނުން ކަމަށެވެ.
އައިޖީއެމްއެޗުން ބުނީ، ރާއްޖޭން ބޭރަށް ބަލި މީހަކު ރިފާރ ކުރުމަށް ފަހުގައި، ފުރުމުގެ އިންތިޒާމުތައް ހަމަޖެއްސުމަކީ، އާސަންދަ ނުވަތަ އެންސްޕާއިން އެއާލައިންތަކާ ގުޅިގެން ކުރާ ކަމެއް ނަމަވެސް އެ ފަދަ ކަންކަމުގައި އާއިލާތައް އުފުލާ ތަކުލީފުތައް ކުޑަކުރުމަށް ސަރުކާރާއެކު މަޝްވަރާ ކުރާނެ ކަމަށެވެ.
ރާއްޖޭގައި މެޑިކަލް ނެގްލިޖެންސްގެ ސަބަބުން ގިނަ ބައެއްގެ ފުރާނަ ގެއްލި އަދި ބައެއް މީހުން ނުކުޅެދޭ މީހުންގެ ގޮތުގައި އުމުރު ދުވަސްތައް ހޭދަކުރަން ޖެހިފައިވެއެވެ. ނަމަވެސް މިއިން އެއްވެސް ކަމެއްގެ އެކަށީގެންވާ ފިޔަވަޅު އިހުމާލުވާ މެޑިކަލް ބޭފުޅުންނާ މެދު އަޅާފައިނުވާކަމުގެ ޝަކުވާއަކީ ގިނަ ޝަކުވާއެކެވެ.
