ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދު (އީއީޒެޑް) ގައި ޤާނޫނާ ޚިލާފަށް މަސްވެރިކަން ކުރަމުންދަނިކޮށް، އެމްއެންޑީއެފުން އަތުލައިގަތް ބޯޓުގައި 300 ކިލޯގެ މަސްތުވާތަކެތި ހުރިކަމަށް ފުލުހުން ބުނެފިއެވެ.

ހުކުރު ދުވަހު އަތުލައިގަތް މަސްބޯޓުން ގިނަ ޢަދަދެއްގެ މަސްތުވާތަކެތި ފެނިފައިވާކަން ދިވެހި ފުލުހުންގެ ޚިދުމަތުން ކަށަވަރުކޮށްދެއްވާފައިވާއިރު، އިތުރު ތަފްޞީލެއް ފުލުހުން ހާމަކޮށްފައިނުވެއެވެ.

މީގެއިތުރުން އެމްއެންޑީއެފުން އިއްޔެ ބުނެފައިވަނީ، އެ ބޯޓު އެމްއެންޑީއެފްގެ ބެލުމުގެ ދަށަށް ގެންދިޔައީ ސިފައިންގެ ވައިގެ ޚިދުމަތް، އެއާ ކޯއިން ޑްރޯން ބޭނުންކޮށްގެން ހިންގި ސަވެއިލަންސެއްގައި އެ ބޯޓު ޤާނޫނާ ޚިލާފަށް ރާއްޖޭގެ ކަނޑުގެ ސަރަޙައްދުގައި ޙަރަކާތްތެރިވާކަން ފާހަގަކުރެވި، ކޯސްޓްގާޑު ސްޕެޝަލް ބޯޓް ސްކޮޑްރަނުން އެ ބޯޓު އިންޓަސެޕްޓް ކުރުމަށްފަހުކަމަށެވެ.

މި މައްސަލައާ ގުޅޭގޮތުން ލަންކާގެ ނޫހެއްގައި ރިޕޯޓުކޮށްފައިވާ ގޮތުގައި، ދިވެހި ސިފައިން އިއްޔެ އަތުލައިގަތީ 300 ކިލޯގެ ހެރޮއިން އާއި ކްރިސްޓަލް މެތު ހިފައިގެން ދަތުރުކުރަމުން ދިޔަ ބޯޓެކެވެ.

އެގޮތުން، އެ ބޯޓުގައި ތިބި ލަންކާގެ ހަ މަސްވެރިއަކުވެސް އެމްއެންޑީއެފްގެ ބެލުމުގެ ދަށަށް ގެނެސްފައިވާކަމަށާއި އެ ބޯޓު އެމްއެންޑީއެފުން ހޯދާފައިވަނީ، ލަންކާގެ ކަނޑުގެ ސިފައިން ފޯރުކޮށްދިން މަޢުލޫމާތެއްގެ މައްޗަށް ބިނާކޮށްކަމަށްވެސް އެ ނޫހުގައި ބުނެފައިވެއެވެ.

މަޢުލޫމާތު ލިބިފައިވާގޮތުގައި، މި މައްސަލައިގެ ތަޙުޤީޤަށް ލަންކާގެ ޓީމެއް ރާއްޖެ އަންނަންވެސް މިހާރުވަނީ ނިންމާފައެވެ.