ޕާކިސްތާނުގައި ބޭއްވި ހަތްވަނަ "ޕާކިސްތާން އާރމީ ޓީމް ސްޕިރިޓް" (ޕެޓްސް) މުބާރާތުން ރަން މެޑަލް ހާސިލުކުރި ދިވެހިރާއްޖޭގެ ޤައުމީ ދިފާޢީ ބާރުގެ ސްޕެޝަލް ފޯސަސްގެ ޓީމު މިއަދު ރާއްޖެ އަތުވެއްޖެއެވެ.

ޕާކިސްތާނުގައި ކުރިއަށްދިޔަ މި މުބާރާތަކީ ދުނިޔޭގެ އެކި ޤައުމުތަކުގެ އަސްކަރިއްޔާތަކުގެ މެދުގައި ބާއްވާ އެންމެ އުނދަގޫ އަދި ވާދަވެރި އެއް މުބާރާތެވެ. މިއަހަރުގެ މުބާރާތުގައި 16 ޤައުމަކުން ޖުމްލަ 24 ޓީމު ބައިވެރިވެފައިވެއެވެ.

އަހަރަކު އެއްފަހަރު ބާއްވާ މި މުބާރާތަކީ ސިފައިންގެ އަސްކަރީ ހުނަރުވެރިކަމާއި، އަޚްލާޤާއި، ހިތްވަރާއި ޢަޒުމް ވަޒަންކުރުމަށް ބާއްވާ މުބާރާތެކެވެ. މީގެ އިތުރުން ބައިވެރިންގެ ބުންވަރާއި، ނަފްސާނީ ދުޅަހެޔޮކަމުގެ އިތުރުން، އުނދަގޫ ޙާލަތްތަކުގައި ޓީމެއްގެ ގޮތުގައި މަސައްކަތް ކުރުމުގެ ޤާބިލުކަން މި މުބާރާތުގައި ޓެސްޓު ކުރެއެވެ.

ދުނިޔޭގެ ބޮޑެތި ބާރުތަކާ ވާދަކޮށް ދިވެހި ސިފައިން ހޯދި މި ކާމިޔާބީއަކީ ދިވެހި އަސްކަރިއްޔާއަށާއި މުޅި ދިވެހިރާއްޖެއަށް ލިބުނު ވަރަށް ބޮޑު ފަޚުރަކާއި ޝަރަފެކެވެ. މި ކާމިޔާބީއާއެކު ދިވެހި ސިފައިންގެ ޤާބިލުކަމާއި ހުނަރުވެރިކަން ބައިނަލްއަޤްވާމީ މައިދާނުގައި ވަނީ ސާބިތުކޮށްދީފައެވެ.

ރަން މެޑަލް ހޯދި ޓީމު ރާއްޖެ އައުމުން ވެލާނާ އިންޓަރނޭޝަނަލް އެއަރޕޯޓުން އެ ބޭފުޅުންނަށް ވަނީ ހޫނު މަރުޙަބާއެއް ކިޔާފައެވެ.