މި ސަރުކާރުން ގެންދަނީ ހުއްޓުމެއް ނެތި ބޮޑެތި ދޮގުތައް ވިހަމުން ކަމަށް ވިދާޅުވެ ޕީޕަލްސް ނެޝަނަލް ފްރޮންޓު (ޕީއެންއެފް)ގެ ރައީސް، ރައީސް އަބްދުﷲ ޔާމީންގެ ނުރުހުން ރައީސް ޑރ މުހައްމަދު މުއިއްޒުގެ ސަރުކާރަށް އަމާޒުކުރައްވައިފިއެވެ.
ރައީސް ޔާމީން މިފަދައިން ވިދާޅުވީ، އާދިއްތަ ދުވަހުގެރޭ ބޭއްވި ޕީއެންއެފްގެ ޓައުން ހޯލު ޖަލްސާގައި އިންނަވާ ދެއްކެވި ވާހަކަފުޅުގައެވެ.
އައްޑޫގެ ރައްޔިތުންނަށް ރައީސް މުއިއްޒުވެވަޑައިގެންފައިވާ ވައުދުތަކަށް ނަޒަރު ހިންގަވާލައްވާ ރައީސް ޔާމީން ވަނީ ވާހަކަފުޅު ދައްކަވާފައެވެ. އެގޮތުން އެމަނިކުފާނު އެންމެ ބޮޑަށް އަލި އަޅުވާލެއްވީ ހަންކެޑައިގައި ހަލާލު ޓުއަރިޒަމް ތައާރަފްކުރާނެ ކަމަށް ވެފައިވާ ވައުދަށެވެ.
އެގޮތުން އެމަނިކުފާނުގެ ތަސައްވުރެއް ކަމަށްވާ ހުޅުދޫ މީދޫގެ ބުރިޖުގެ ވާހަކަ ހިއްސާ ކުރައްވާ ރައީސް ޔާމީން ވިދާޅުވެފައިވަނީ އެއީ އެމަނިކުފާނުގެ ތަސައްވުރެއް ކަމަށާ ރައީސް މުއިއްޒު އެކަން ތަކުރާރުކުރައްވާ ވައުދުވެވަޑައިގެންނެވީ ކަމަށެވެ. ހަމައެހެންމެ އައްޑޫއާ ޖެހުމުން ހަލާލު ޓުއަރިޒަމްގެ ނަން ދީގެން ހުރި ފުރުސަތުތައް ހަނިކޮށް ކުރިއަށް ގެންދަން އުޅެނީ ނުނިޔަތެއްގެ މަސައްކަތެއް ކަމަށެވެ.
މާލެ ސަރަހައްދުގައި އޮތް ޓުއަރިޒަމް ހަލާުނުކޮށް އައްޑޫއާ ޖެހުމުން ހަލާލު ޓުއަރިޒަމްގެ ވާހަކަ ދައްކާއިރު އައްޑޫ ރައްޔިތުންނަށް ހެޔޮ އެދޭ ނަމަ ސަރުކާރުން އެކަން އިކިއުޒިޝަން ކޮސްޓަކާ ނުލާ އެކަން ކޮށްނުދެއްވަނީ ކީއްވެ ކަމާ މެދު ރައީސް ޔާމީން ސުވާލު އުފެއްދެވިއެވެ.
އެމަނިކުފާނު ވިދާޅުވީ ދެވެން އޮތް އިންޓެންސިވްއެއްދީގެން އެކަން ކޮށް ސަރުކާރުން އައްޑޫ ރައްޔިތުންނަށް ކަމެއްކޮށްދޭން ބޭނުންނަމަ ކުރެވޭނެ ކަމަށާ އިހަކަށް ދުވަހު 2.8 ބިލިއަނެއްހާ ރުފިޔާގެ ޕްރޮޖެކްޓުތައް ބަހާލިއިރު އެކިއުޒިޝަން ކޮސްޓު ނުނަގާ ކަމަށާ އެހެންކަމުން ހަންކެޑަވެސް އިކިއުޒިޝަން ކޮސްޓު ނުނަގާ އެކަން ކުރެވެން ވާނެ ކަމަށެވެ.
ނަމަވެސް އެކަން އެގޮތަށް ނުކުރާނެ ކަމަށާ އެއީ އެކަން ވިޔަސް ނުވިޔަސް ރައީސް މުއިއްޒުގެ ފަރުވާލެއް ނެތުން ކަމަށްވެސް ރައީސް ޔާމީން ވިދާޅުވިއެވެ. އެމަނިކުފާނު ވިދާޅުވީ އެއީ ހަމަ އައްޑު ރައްޔިތުންނަށް ހެވެއް އެދިގެން ހެޔޮ ނިޔަތެއްގައި ދައްކަމުންދާ ވާހަކަތަކެއް ނޫން ކަމަށާ ސަރުކާރުން ވިހަމުން ދަނީ ބޮޑެތި ދޮގުތައް ކަމަށާ އެ ދޮގުތައް ހުއްޓުވާނެ ގޮތެއްވެސް ނެތް ކަމަށެވެ.
ރައީސް ޔާމީން އިތުރަށް ވިދާޅުވީ ރައީސް މުއިއްޒުގެ އަމަލުތައް މިހެން ހުރިއިރު ހިތަދޫ މެދު ދާއިރާގެ މެމްބަރު އަހުމަދު އަޒާންމެން ފަދަ ބޭފުޅުންނަށް ރައީސް މުއިއްޒު އައްޑޫއަށް ތަރައްގީ ގެންނަވާނެ ކަމާމެދު އުއްމީދު ލިބުމުން ހައިރާންވެވަޑައިގަންނަވާ ކަމަށެވެ.
ހަންކެޑަ ތަރައްޤީކުރުމަށް ކުރިން ވެފައިވާ އެއްބަސްވުންތައް ބާޠިލުކޮށް، އިންޓަގްރޭޓެޑް ޓޫރިޒަމް މަޝްރޫއެއްގެ ގޮތުގައި ބީލަމުގެ އުސޫލުން ތަރައްޤީކުރުމަށް ހަމަޖެހިފައިވާ ކަމަށާއި މީގެ އިތުރުން، ހަންކެޑަގެ ބަދަލުގައި، އައްޑޫ އަތޮޅުގެ ދޮންހެރަ "ހަލާލް ޓޫރިޒަމް" ތަރައްޤީކުރުމަށް ބީލަމަށް މާރިޗު މަހުގެ ތެރޭގައި ހުޅުވާލިއެވެ. އަދި ހަންކެޑަ ހަލާލު ޓޫރިޒަމަށް ތަަރައްގީ ކުރާ ރަށެއް ގޮތުގައި ޖޫން މަހުގެ ތެރޭގައި ރައީސް މުއިއްޒު ކަނޑައެޅުއްވިއެވެ.