އަތޮޅުތެރޭގެ ރަށް ރަށަށް ކުރައްވަނީ "ރަސްމީ" ދަތުރުފުޅުތަކެއް ކަމަސް ވިދާޅުވެ ރައީސް މުހައްމަދު މުއިއްޒު ގެންދަވަނީ ކެމްޕެއިން ކުރައްވަމުން ކަމަށް ބުނެފިއެވެ.

ދާދި ފަހުން ރައީސް މުއިއްޒުވަނީ ނ. އަތޮޅުގެ ރަސްތަކަށް ވަޑައިގެންފައެވެ. އެ ދަތުރުފުޅުގެ ތެރެއިން ނ. އަތޮޅު ކެނދިކުޅުދޫއަށް ކުރެއްވި ދަތުރުފުޅުގައި ރަށު ކައުންސިލުގެ ބޭނުން ނަހަމަ ގޮތުގައި ހިއްޕަވާ ރައީސް މުއިއްޒު ވަނީ ކެމްޕެއިން ކުރައްވާފައިކަމަށް ބުނެ އެ ރަށު ކައުންސިލުން ވަނީ ބަޔާނެއް ނެރެ އެކަން ކުށްވެރިވެސް ކޮށްފައެވެ.

އެމްޑީޕީގެ ކައުންސިލެއް އޮންނަ ކެނދިކުޅުދޫއިން ނެރުނު އެ ބަޔާނުގައި ވަނީ ރައީސް މުއިއްޒު ރަސްމީ ދަތުރުފުޅެއްގައި އެ ރަށަށް ކުރެއްވި ޒިޔާރަތުގައި ކައުންސިލްގެ ރުހުން ނެތި، ކައުންސިލުން ކުރިއަށް ގެންދިޔަ ހަރަކާތްތައް ސިޔާސީ ހަރަކާތެއްގެ ގޮތުގައި ސިވަފާ ގޮތަށް، ރައްޔިތުންގެ މަޖިލީހުގެ އިންތިހާބުގައި ސަރުކާރަށް ނިސްބަތްވާ ޕާޓީއަށް ތާއީދު ހޯދުމަށް ވާހަކަފުޅުދައްކަވާފައިވާ ކަމަށެވެ.

ރައީސް ރަސްމީ ދަތުރުފުޅެއްގައި އެ ރަށަށް ޒިޔާރަތް ކުރުމަށް ހަމަޖެހިފައިވާތީ އެ ދަތުރުފުޅުގެ އެންމެހައި އިންތިޒާމުތައް ހަމަޖައްސައިދިނުމަށް އެދި ރައީސް އޮފީހުން އެންގެވި އެންގުމާ އެއްގޮތަށް އެ ކައުންސިލުން ވާނީ އެ ދަތުރުފުޅާއި ގުޅިގެން ކުރަންޖެހޭ އެންމެހައި އިންތިޒާމުތައް ހަމަޖައްސައިދީފައި ކަމަށް ބަޔާނުގައިވެއެވެ. އެގޮތުން ރައީސް ރަށަށް ފައިބާވަޑައިގަތުމަށްފަހު ރަށުގެ ރައްޔިތުންނާ މުހާތަބު ކުރުމަށް ބޭއްވި ހަފްލާގެ އެންމެހައި އިންތިޒާމެއް ހަމަޖައްސައި އެ ހަފްލާގައި ކައުންސުލުންވެސް ބައިވެރިވިކަން ފާހަގަކުރިއެވެ.

"އެހެން ނަމަވެސް އެ ހަފްލާގެ ވަކި ހިސާބަކުން ރައީސާއި އެމަނިކުފާނުގެ ކެބިނެޓްގެ ބައެއް ބޭފުޅުން ދެއްކެވި ވާހަކަފުޅުގެ މިސްރާބުު މަޖިލިސް އިންތިހާބަށް ކުރިމަތިލާފައިވާ ކެނޑިޑޭޓުންނަށް ތާއީދު ހޯދުމަށް ދެއްކެވި ވާހަކަފުޅަކަށް ބަދަލުވެގެން ދިޔަ. ކައުންސިލަށް އެ ހަފްލާ ސިފަވެގެން ދިޔައީ ރަސްމީ ދަތުރުފުޅެއްގެ ނަމުގައި ވަޑައިގެން މަޖިލީހުގެ އިންތިހާބަށް ސަރުކާރަށް ނިސްބަތްވާ ޕާޓީއަށް ތާއީދު ހޯދުމަށް ކުރިއަށް ގެންދިޔަ ހަރަކާތެއްގެ ގޮތުގައި." ބަޔާނުގައިވެއެވެ.

ރައީސްގެ މަގާމުގައި ހުންނަވާ ބޭފުޅަކީ ސިޔާސީ ޕާޓީއެއްގެ ޓިކެޓުގައި ރިޔާސީ އިންތިހާބުގައި ވާދަކޮށް އެ މަގާމަށް ހޮވިވަޑައިގެންފައިވާ ފަރާތަކަށްވާތީ އެ މަގާމު ފުރުއްވުމުގައި ވަކި ޕާޓީއެއް ޕްރޮމޯޓްކޮށް ސިޔާސީ ގޮތުން އެ ޕާޓީގެ ކެންޑިޑޭޓުންނަށް ތާއީދު ހޯދުމަށް މަސައްކަތް ކުރުމަކީ ގާނޫނުން މަނާކޮށްފައިވާ ކަމަށް ނުވާތީ ރައީސަށް އެކަން ކުރެވިދާނެ ކަމަށް ބަޔާނުގައިވެއެވެ. ނަމަވެސް، ކައުންސިލުން ބާއްވާ އެފަދަ އިވެންޓުތަކުގައި ކެމްޕެއިން ނުކުރެވޭނެކަން ފާހަގަކުރިއެވެ.

"ނަމަވެސް އިންތިހާބަށް ކެމްޕެއިން ކުރުމަށްޓަކައި ސަރުކާރުގެ އޮފީސްތަނާއި ކައުންސިލްތަކުގެ އިދާރާތައް ބޭނުންކުރުމަކީ ކަނޑައެޅިގެން އިންތިހާބުތަކާ ބެހޭ އާންމު ގާނޫނު މަނާކޮށްފައިވާ ކަމެއް" ބަޔާނުގައިވެއެވެ.

ބަޔާނުގައި ބުނެފައިވަނީ ކައުންސިލުން އިންތިޒާމުކޮށްގެން ބޭއްވި ހަފްލާ އިންތިހާބަށް ކެމްޕެއިން ކުރުމުގެ މަގްސަދުގައި އިންތިޒާމުކުރެވުނު ހަފްލާއަކަށް ބަދަލުވެގެންދިޔަ ދިއުން ކައުންސިލްގެ ފަރާތުން ކުށްވެރިކުރާ ކަމަށެވެ.

އޭގެ އިތުރުން، ދައުލަތުގެ ވަސީލަތްތަކާއި ދައުލަތުގެ އިދާރާތަކުގެ ނަހަމަ ބޭނުން ހިފައިގެން ހިންގޭ އެފަދަ އަމަލުތަކުގެ ސަބުން ރައްޔިތުންގެ މެދުގައި ދައުލަތުގެ އިދާރާތަކަށް ކުރާ އިތުބާރަށް ވަރަށް ބޮޑަށް ބުރޫއަރާނެ ކަމަށްވެސް އެ ބަޔާނުގައިވެއެވެ.