އިލެކްޝަންސް ކޮމިޝަން (އީސީ) އިން އެދެނީ އެޕްރިލް 21، އަދި 22 ބަންދުކޮށްދޭން ކަމަށް އެ ކޮމިޝަނުގެ ނައިބުރައީސް އިސްމާއިލް ހަބީބު ވިދާޅުވެއްޖެއެވެ.

ރޯދަމަހު އިންތިޚާބު ނުބޭއްވޭހެން ގެނައި އިސްލާހު ރައީސް ޑރ. މުޙައްމަދު މުއިއްޒު އެންމެ ފަހުން ހުކުރު ދުވަހު ތަސްދީގުކުރެއްވުމާއެކު، ކުރިން މި މަހު17ގައި ބާއްވަން އޮތް އިންތިޚާބު ފަސްކުރަންޖެހުނީއެވެ.

އެގޮތުން އެ ދުވަހުގެ ރޭ އިލެކްޝަންސް ކޮމިޝަނުން ނިންމީ އަންނަ މަހު 21ގައި އިންތިީޚާބު ބާއްވާށެވެ. އެއީ އާދިއްތަ ދުވަހެވެ.

އެއާއެކު އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ، އިންތިހާބު އޮންނަ ދުވަހަކީ ސަރުކާރު ރަސްމީ ބަންދު ދުވަހެއްގެ ގޮތުގައި ހަމަޖައްސައިދިނުމަށް އެ ކޮމިޝަނުން މިއަދު ރައީސް އޮފީހަށް ސިޓީ ފޮނުވާނެ ކަމަށެވެ.

އީސީގެ ރައީސް ފުއާދު ތައުފީގް ވިދާޅުވެފައިވާ ގޮތުންނަމަ މިހާރު ކަނޑައަޅާފައިވާ ތާރީހަށް ވުރެން އިންތިހާބު ލަސްކޮށްފިނަމަ މިހާރުގެ މަޖިލިސް އުވޭއިރަށް އާ މަޖިލިސް އިންތިހާބު ނުކުރެވި ގާނޫނީ މައްސަލަތަކެއް ކުރިމަތިވެދާނެ ކަމުގެ ބިރު އެބައޮތެވެ.

އިންތިހާބު އޮންނަ ދުވަހަކީ އާދިއްތަ ދުވަހަކަށްވާތީވެ އިދިކޮޅު އެމްޑީޕީން ކަންބޮޑުވުން ފާޅުކޮށްފައިވެއެވެ. ކުރީގެ ރައީސް އަދި އެ ޕާޓީގެ އެޑްވައިޒަރު އިބްރާހިމް މުހައްމަދު ސޯލިހު ތުހުމަތުކުރައްވާ ގޮތުގައި އާދިއްތަ ދުވަހު އިންތިހާބު ބާއްވަނީ އީސީއަށް، ރައީސް މުއިއްޒު ނުފޫޒު ފޯރުވައިގެންނެވެ.