ރައީސް މުހައްމަދު މުއިއްޒުގެ ސަރުކާރަށް ދެ އަހަރު ފުރުން ފާހަގަކުރުމަށް ވެރިކަންކުރާ ޕީއެންސީ އިން ބޭއްވި އެއްވުމަކީ ރާއްޖޭގެ ސިޔާސީ ތާރީހުގައި ބޭއްވި އެންމެ ބޮޑު، އެންމެ މީހުން ގިނަ އެއްވުން ކަމަށް ވިދާޅުވިއިރު ގިނަ މީހުން ދިޔައީ ވަޒީފާގެ ބިރުގައިކަން ހާމަވެއްޖެއެވެ.
ރައްޔިތުންގެ ތާއިދު އޮތްކަމަށް ރައީސް މުއިއްޒާއި ޕީއެންސީން ބުނިކަމުގައި ވިނަމަވެސް ގިނަ މީހުން ރޭ ޖަލްސާގައި ބައިވެރިވެފައިވަނީ ހާޒިރީ ބަލާނެކަމަށް ބުނެ ބިރު ދެެއްކުމުންކަމަށް ތޭރައޮންލައިނަށް ވަނީ މައުލޫމާތު ލިބިފައެވެ.
ޖަލްސާގައި ރައީސް މުއިއްޒު ފޮނިކަނޑުއްވާ ވިދާޅުވީ މިއީ ރާއްޖޭގެ ސިޔާސީ ހަޔާތުގަ ބޭއްވޭ އެންމެ މީހުން ގިނަ ބައްދަލުވުންކަމަށެވެ. މިވަގުތު ވެސް މިތަނުގައި 13،000 އަށްވުރެ ގިނަ ރައްޔިތުން އެބަތިބިކަމަށް ރައީސް މުއިއްޒު ވިދާޅުވިއެވެ.
ނަމަވެސް ރާއްޖޭގައި މީގެކުރިން ވެސް މިޔަށްވުރެ މީހުން ގިނަ އެއްވުންތައް ބާއްވާފައިވެއެވެ.
އެއްވުމުގައި ބައިވެރިވުމަށް މާލެއިންނާއި ރާއްޖެތެރެއިން އައި އެންމެނަށް މުއިއްޒު ވަނީ ތަކުރާރުކޮށް ޝުކުރާއި މަރުހަބާ ދަންނަވާފަ އެވެ.
މިރޭގެ އެއްވުމަށް ރާއްޖޭގެ އެކި ކަންކޮޅުތަކުން ޕީއެންސީގެ ސަޕޯޓަރުންނާއި ސިޔާސީ މަގާމުތަކުގައި ތިބި މީހުން އަދި ސަރުކާރުގެ ގިނަ އަދަދެއްގެ މުވައްޒަފުން ވަނީ މާލެ އައިސްފަ އެވެ. އެ މީހުންނަށް ފައިސާ ބެހި ކަމުގެ މައުލޫމާތު ވެސް ތޭރައޮންލައިނަށް ލިބިފައިވެއެވެ.
