ޕާކިސްތާނުގައި މިދިޔަ އަންގާރަ ދުވަހު ހަށިގަނޑުގައި ބޮމެއް ހަރުކޮށްގެން ގޮއްވާލި މައްސަލައިގައި އެ ގައުމުގައި ހަރަކާތްތެރިވާ ތާލިބާނުންގެ ބަޔަކު ހައްޔަރުކޮށްފިއެވެ.

ބޮމުގެ ހަމަލާދިނީ ތާލިބާނުންގެ ޕާކިސްތާނު ގޮފި، ތެހެރިކާ ތާލިބާނަށް ނިސްބަތްވާ ބައެއްކަމަށް ޕާކިސްތާނުގެ އިދާރާތަކުން ބުނެއެވެ. މި ޖަމާއަތަކީ ޕާކިސްތާނުގެ ސަރުކާރުގެ މަދަދުވެރިކަމުގެ ފަހަތުގައި އޮޕަރޭޓްކުރާ ބައެއްކަމަށް އިންޑިއާއިން ކުރިއްސުރެ ތުހުމަތުކުރަމުން އަންނަ ބައެކެވެ.

އިސްލާމްއާބާދުގެ ކޯޓު ކޮމްޕްލެކްސްއެއްގެ ކުރިމަތީގައި އަންގާރަ ދުވަހު ދިން ހަމަލާގައި 12 މީހަކު މަރުވެ، ގިނަ ބަޔަކު ޒަޚަމްވިއެވެ.

ޕާކިސްތާނުން ބުނީ މި ހަމަލާގެ ކަންކަން އިންތިޒާމުކޮށް، ހަމަލާގެ ކަންކަން ވަގުތުން ވަގުތަށް ބަލަހައްޓަމުން ދިޔައީ އަފްޣާނިސްތާނުގައި ގާއިމްވެ ތިބި، ތެހެރިކާ ތާލިބާނުންގެ ވެރިން ކަމަށެވެ. އަދި ޕާކިސްތާނުން ހައްޔަރުކުރީ މި ހަމަލާދިން ސެލްގެ ކޮމާންޑަރާއި، އޭނަގެ ދަށުން މަސައްކަތްކުރާ ތިން ހަނގުރާމަވެރިން ކަމަށެވެ.

އަފްޣާނިސްތާނުގެ ދާޚިލީ ވަޒީރު މުހްސިން ނަގްވީ ސެނެޓުގައި ވިދާޅުވީ މިހަމަލާގައި ބޮން ހަރުކޮށްގެން ހަށިގަނޑު ގޮއްވާލީ އަފްޣާނިސްތާނަށް ނިސްބަތްވާ ހަނގުރާމަވެރިއެއް ކަމަށެވެ.

އަހަރުތަކަކަށްފަހު ޕާކިސްތާނުގެ ވެރިރަށް އިސްލާމްއާބާދުގައި ހަނގުރާމަވެރިން ހަމަލާއެއް ދީފައި މިވަނީ އޭގެ ކުރީ ދުވަހު އިންޑިއާގެ ވެރިރަށް ދިއްލީއަށްވެސް ހަނގުރާމަވެރިން ހަމަލާއެއް ދީފައިވަނިކޮށެވެ.