ރައްޔިތުންގެ ހައްގުގާ ޕީއެންސީގެ މެމްބަރުންވެސް ބަސްބުނަން ފެށުމަކީ ހެޔޮ ފާލެއްކަމަށް ޕީޕަލްސް ނޭޝަނަލް ފްރޮންޓް (ޕީއެންއެފް) ގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ޑރ. ޖަމީލް މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

އެމަނިކުފާނު މިފަދައިން ވިދާޅުވީ ފާއިތުވެދިޔަ ދެ އަހަރު ދުވަސް ތެރޭގައި މި ސަރުކާރުން މަޑަވެއްޔަށް އެއްވެސް ކަމެއް ނުކޮށްދޭ ކަމަށް ބުނެ، ވެރިކަންކުރާ ޕީއެންސީއަށް ނިސްބަތްވާ މަޑަވެލި ދާއިރާގެ މެންބަރު މުހައްމަދު ޝަމީޒް ވިދާޅުވި ވިދާޅުވުމަށް ނިސްބަތްކޮށެވެ.

ޑރ. ޖަމީލް ވިދާޅުވީ، އާބާދީ ބޮޑު ފުވައްމުލަކާ އައްޑޫ މެމްބަރުންނަށް މިވަރުވެސްކޮށްލަން ނުކެރޭކަމަށެވެ. އަދި ފެނަށްޖެހިފައިވާ ފުވަައްމުލަކު މެމްބަރުންގެ ފޯކަސްހުރީ ބޮޑު ޖަލްސާއަށް މީހުން ޖަމާކުރުމަށް ކަމަށްވެސް އެމަނިކުފާނު ފާހަގަކުރެއްވިއެވެ.

އިތުރަށް ޑރ. ޖަމީލު ވިދާޅުވީ ގިނަ މެމްބަރުން ތިބީ ވެރިމީހާ ރުހޭގޮތަށް ކޮންމެ ކަމެއްގެ ޒިއްމާ ކުރީ ސަރުކާރު ކިޔާ ރެކިގަންނަ ގޮތަށެވެ. އަދި ގާނޫނީ ވަކީލުން މިވަނީ ރައްޔިތުންގެ ވަކީލުންނަށްވުރެ ޕާޓީއާ ވެރިމީހެ ވަކީލުންނަށް ވެފައިކަމަށްވެސް ޑރ. ޖަމީލު ވިދާޅުވިއެވެ.

މިއަދު ރައިސް މުއިއްޒުގެ ވެރިކަމަށް 2 އަހަރު ވެގެން ދިޔަ އިރު ރާއްޖޭގެ ހުރިހާކޮޅަކުން އަދި ޚުދު އެމަނިކުފާނުގެ ޕާޓީއަށް ނިސްބަތްވާ މެމްބަރުން ވެސް ބުނަމުން ދަނީ އެ މީހުންގެ ރަށްރަށަށް ބޭނުންވާ ތަަރައްގީގެ މަޝްރޫއުތަކަށް މި ސަރުކާރުން އަހައްމިޔަތުކަމެއް ނުދޭކަމަށެވެ.