ރާއްޖޭގެ ކަނޑުގެ ސަރަހައްދު ނުވަތަ އެކްސްކްލޫސިވް އިކޮނޮމިކް ޒޯން (އީއީޒެޑް) އަށް ވަތް އިންޑިއާގެ މަސް ބޯޓެއް އަތުލައިގެންފިއެވެ.
އެމްއެންޑީއެފްގެ މީޑިއާ އޮފިޝަލް ވިދާޅުވި ގޮތުގައި ރޭގެ ވަގުތެއްގައި މި މަސް ބޯޓު އަތުލައިގަތީ ގަވައިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ މަސްވެރިކަން ކުރަމުންދިޔަ ކަމުގެ ތުހުމަތުގައި ކަމަށެވެ.
އެހެންކަމުން އެމްއެންޑީއެފް ކޯސްޓްގާޑްގެ ބެލުމުގެ ދަށުން މި ބޯޓު މާލެ ގެނައުމުގެ މަސައްކަތް ކުރަމުންދާ ކަމަށް އެމްއެންޑީއެފުން ވަނީ ހާމަކޮށްފައެވެ.
އަދި އެ ބޯޓު އަތުލައިގަތީ ހއ. ކެލާގެ އިރުއިތުރުން ގާތްގަނޑަކަށް 10 ވަރަކަށް މޭލު ބޭރުން ކަމަށް ވެސް އެމްއެންޑީއެފުން ވަނީ މައުލޫމާތު ދީފައެވެ.
މީޑިއާ އޮފިޝަލް ވިދާޅުވީ އެ ބޯޓުގައި ތިބި މީހުންނާ މެދުގައި ފިޔަވަޅު އަޅާނީ މަސްވެރިކަމާ ގުޅޭ ގާނޫނުގެ ތެރެއިން ފިޝަރީޒް މިނިސްޓްރީން ކަމަށެވެ.
މީގެ ދުވަސްކޮޅެއްކުރިން އިންޑިޔާގެ ކޯސްޓްގާޑުންވެސް ވަނީ ހަތިޔާރާއެކުގައި ރާއްޖޭގެ މަސްދޯނިތަކަކަށް އަރާފައެވެ. މިކަމާ ގުޅޭގޮތުން އިންޑިޔާގެ ބަހެއް އަދިވެސް ލިބިފައިނުވާކަމަށް ޑިފެންސް މިނިސްޓްރީން މައުލޫމާތު ދެއެވެ.
ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުންދިޔަ ރާއްޖޭގެ މަސްދޯނިތަކަކަށް އިންޑިޔާގެ ކޯސްޓްގާޑުން ހަތިޔާރާއެކު އެރި އެރުން ގިނަ ފަރާތްތަކުން ވަނީ ކުށްވެރިކޮށްފައެވެ. އަދި މަސް ދޯނިތަކުގައި ތިބި މަސްވެރިންގެ ހިތްވަރުގަދަ ކަން ފާހަގަކޮށް މަސްވެރިންނަށް ގިނަ ފަރާތްތަކުން އަންނަނީ ތައުރީފް ކުރައްވަމުންނެވެ.
