ރާއްޖޭގައި ގޭންގެއްގެ ޝަރުތު ހަމަވާ އެއްވެސް ބަޔަކު ނެތް ކަމަށާއި އެފަދަ ހަރަކާތްތައް ހިންގާ ގްރޫޕްތަކުން އެކަން ހުއްޓާލާފައިވާ ކަމަށް ރައީސް މުއިއްޒު ވިދާޅުވެއްޖެއެވެ.

ސަރުކާރަށް 730 ދުވަސް ފާހަގަކުރުމަށް 14 ނޮވެމްބަރު ދުވަހުގެ ރޭ ބޭއްވި ޖަލްސާގައި ވާހަކަދައްކަވަމުން މުއިއްޒު ވިދާޅުވީ ރާއްޖޭގައި ގާނޫނީ ގޮތުން ކަނޑައެޅިފައިވާ އެއްވެސް ގޭންގެއް ނެތްކަމުގެ މައުލޫމާތު ލިބިފައިވާ ކަމަށާއި މި މައުލޫމާތު ދީފައިވަނީ ހޯމް މިނިސްޓަރު އަލީ އިހުސާން ކަމަށްވެސް ވިދާޅުވިއެވެ.

ރައީސް އާއި މިނިސްޓަރު މިފަދަ ބިޔަ ބޮޑު ޖަލްސާއެއްގައި ދެއްކެވިއިރު ސަރުކާރުން ކަނޑަނޭޅިއަސް މާލެ ސަރަހައްދުގައި އެކަނިވެސް އެކި ނަން ނަމުގައި އެތަކެއް ގޭންގްތަކެއް އޮޕަރޭޓް ކުރަމުން އަންނަކަން ފާހަގަވެއެވެ. އަދި މި ގޭންގް ނުވަތަ ގްރޫޕްތަކުގައި ކުޑަކުދިންގެ ޝާމިލުވުންވެސް އޮންނަ ވަރު އިތުރުވަމުން އަންނަކަންވެސް ފާހަގަކުރެވެއެވެ.

މީގެ އިތުރުން، މި ސަރުކާރުގެ ހޯމް މިނިސްޓްރީގެ ނައިބު، މުހައްމަދު ޝަހީދު ވިދާޅުވީ ރާއްޖޭގައި 83 ގޭންގު މިހާރު ހަރަކާތްތެރިވަމުންދާ ކަމަށެވެ. އެ ގޭންގުތަކުގައި 3600 މީހުން، ކުށްކުރުމުގައި އުޅޭ ކަމަށް އޭނާ ވަނީ މީގެ ކުރިން ވިދާޅުވެފައެވެ. އަދި ވެރި ރަށް މާލޭގައި އެކަނި ވެސް 45 ގޭންގު ހަރަކާތްތެރިވާ ކަމަށް އޭނާ ވިދާޅުވި އެވެ.

ފާއިތުވި ދެ އަހަރު ތެރޭގައި ކުރެވުނު ބޮޑު ކާމިޔާބީއެއް ގޮތަށް ސިފަކޮށް ރައީސް މިފަދައިން ވިދާޅުވުމުން ގިނަ ބަޔަކު އަންނަނީ މުއިއްޒަށް ބޮޑެތި ފާޑުކިޔުންތައް އަމާޒުކުރަމުންނެވެ.

މިގޮތުން، ޕީއެންސީއިން ބޭއްވި ޖަލްސާގައި މުއިއްޒު ހެއްދެވީ ހުސްދޮގު ކަމަށާއި މުއިއްޒު ވަނީ ދޮގުން ނެގޭ އެންމެ މަތީ ފާސް ނަންގަވާފަ ކަމަށް ކުރީގެ ހޯމް މިނިސްޓަރކަން އަދާކުރެއްވި އުމަރު ނަސީރުވެސް ވަނީ ވިދާޅުވެފައެވެ.