ސާފުތާހިރުކަން ކުޑަ ކެފޭ ތަކާއި ހުއްދަ ނުނަގާ ކާބޯތާކެތި އުފައްދާ ވިއްކަމުންދާ އެތައް ތަނެއް މާލޭގައި އެބަހުރި ކަމަށް މާލެ ސިޓީ ކައުންސިލުން ބުނެފިއެވެ.

މާލެ ސިޓީ ކައުންސިލުން މިހެން ބުނެފައިވަނީ މިދިޔަ މަހުގެ 18 ވަނަ ދުވަހުން ފެށިގެން އެ ކައުންސިލާއި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކުރިއަށް ގެންދިޔަ އިންސްޕެކްޝަން ނިންމާލުމަށްފަހު ނެރުނު ބަޔާނެއްގައެވެ.

މި އިންސްޕެކްޝަނުގައި މާލެ، ހުޅުމާލެ، ވިލިމާލެ، ހުޅުލެ، ތިލަފުށި، ގުޅީފަޅު އަދި ކްރޮސްރޯޑުގައި ހުރި ކާބޯތަކެތި އުފައްދާ ތަންތަން ވަނީ ބަލައި ފާސްކޮށްފައެވެ.

ސިޓި ކައުންސިލުން ބުނީ ސާފުތާހިރު ކަމުގެ މިންގަނޑަށް ނުފެތޭ އެތައް ތަނެއް މާލޭގައި އެބަހުރި ކަމަށެވެ.

އެގޮތުން ގިނައީ ކުދި ކުދި ކެފޭތައް ކަމަށާއި އަދި ބިދޭސީން ހިންގާ ތަންތަނެވެ.

މީގެ އިތުރުން ހުއްދަ ނުނަގައި ބިދޭސީންތައް ކާބޯތަކެތި އުފައްދަމުން ގެންދާ އެތައް ތަނެއްވެސް މި އިންސްޕެކްޝަންގެ ތެރެއިން ހޯދިފައިވާ ކަމަށެވެ.

މި ތަންތަނާމެދު އެޗްޕީއޭ އިން ފިޔަވަޅު އަޅާނެ ކަމަށްވެސް އެ ކައުންސިލުން ވަނީ ބުނެފައެވެ.