ރައީސް މުހައްމަދު މުއިއްޒުގެ ސަރުކާރުން އެސްޑީއެފްސީ މެދުވެރިކޮށް "ކާރުއެމްވީ" ނަމަކަށް ކިޔާ ކުންފުންޏަކަށް ފައިސާދީގެން ގެންނަން ބުނި ކާރުތައް ނުލިބޭ ކަމަށާއި، ކާރު ލޮަލަށް ނުފެނި ލޯނަށް ކޮންމެ މަހަކު 7000 ރުފިޔާ ކަނޑަން ފަށާފައިވާ ކަމަށް ޑްރައިވަރސް އެސޯސިއޭޝަނުން ހާމަކޮށްފިއެވެ.

ޑްރައިވަރސް އެސޯސިއޭޝަނުން ބޭއްވި ނޫސްވެރިންގެ ބައްދަލުވުމުގައި ލޯނު ލިބުނު ޓެކްސީ ޑްރައިވަރެއް ކަމަށްވާ އާދަމް ސަލީމް ބުނީ "ޓެކްސީ ނަފާ" ލޯނު ކަންތައްތައް ދިމާވީމާ ރައީސް އޮފީހަށް 14 ޖުލައިގައި ހުރި ހުރިހާ ކަންބަޮޑުންތައް ހިމެނޭ ގޮތަށް ރައީސް އާއި ބައްދަލުކުރަން އެދި ސިޓީއެއް ފޮނުވާފައިވާނެ ކަމަށެވެ.

އޭނާ ބުނީ މި މައްސަލައިގައި ޙައްލެއް ދެވޭނީ ރައީސް އަށް ކަމަށް ވާތީ އެފަދައިން އެދިފައިވާނެ ކަމަށެވެ. އޭނާ ބުނީ މި ލޯނުގައި ކާރު ލޯނަށް އެދުނު 22 މީހުންނާއި އެ 22 މީހުންނަށް ގެރެންޓީ ދިން 22 މީހުން ހިމެނޭހެން 44 މީހަކު މި ލޯނުގައި ޖެހިފައިވާ ކަމަށެވެ.

ސަލީމް ބުނީ ޓެކްސީ އަތަށް ވެސް ނުލިބޭ ކަމަށާއި، ހެނދުނު ހޭލި އިރު ލޯނަށް ފައިސާ ކަނޑާފައިވާ ކަމަށެވެ. ސަލީމް ބުނީ ރައީސް އޮފީހަށް ގޮސް އެތަނުގެ ބައެއް ފަރާތްތަކާއި ދިމާވެގެން އެ ޝަކުވާތައް ވެސް ހުށަހެޅި ކަމަށެވެ. ނަމަވެސް މި މައްސަލައިގައި ހައްލެއް އަދިވެސް ނުލިބޭ ކަމަށެވެ.

ސަލީމް ބުނީ ކުރީ ސަރުކާރުން ލޯނަށް ގެޒެޓް ކުރެވުުނު ނަމަވެސް، މިހާރުގެ ސަރުކާރު ވުޖޫދުވެފަ ޖަނަވަރީ ފެބުރުއަރީ މަސް ތެރޭގައި އެގްރީމެންޓުތަކުގައި ސޮއިކުރަން ފެށީ މަޖިލިސް އިންތިޚާބު ބޯމަތިވެފައި އޮއްވާ ކަމަށެވެ. އަދި ޓެކްސީގެ ފައިސާ ޑްރައިވަރުންނަށް ނުދީ އެސްޑީއެފްސީ އިން 'ކާރުއެމްވީ' ކިޔާ ކުންފުންޏަކަށް ފައިސާ ޖަމާކުރި ކަމަށެވެ. އަދި ކާރުއެމްވީކިޔާ ކުންފުންޏަށް 22 މީހުންގެ 60 ޕަސެންޓް ލާރި ޖަމާކޮށްފައި އޮތް ނަމަވެސް، މިހާތަނަށް އެ ކުންފުނިން ބުނަމުންދަނީ 14 ކާރު އޮތް އިރު 3 ކާރު އޮތީ ބީ ޒޯނަށް ރަޖިސްޓްރީކުރެވިފައި ކަމަށެވެ. އަދި ދެން ހުރި އެއްޗެއްސަށް ވާނުވާ ނޭނގޭ ކަމަށާއި، ޑޮކިއުމެންޓެއް ހަމައެއް ނުވާ ކަމަށް ސަލީމް ބުނެފައިވެއެވެ.

ކަންބޮޑުވުން ފާޅުކޮށް ފޮނުވި ސިޓީއަށް ޖަވާބު ނުދެެއްވާ ރައީސް އުޅުއްވަނީ ފުޓުބޯޅަ ކުޅުމާއި އޭޓީއެމްތައް ހުޅުވުމުގައިކަމަށް އެ އެސޯސިއޭޝަން އިން ވަނީ ބުނެފައެވެ.