ރައީސް މުހައްމަދު މުއިއްޒަށް މާނަވީ މާބޮޑު ކަމެއް ކުރެވޭނެ ކަމަކަށް ނުފެންނަ ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
ވަކި މީހަކަށް ވަކި ގޮތެއް ފިޔަވަޅުތައް އެޅުމުގައި ނުގެންގުޅޭނެ ކަމަށް ވިދާޅުވެފައިވަނިކޮށް ރައީސް މުއިއްޒުގެ ސަރުކާރުން ވަނީ ކުރިގެ ބަންޑާރަ ނައިބު އައިޝަތު އާޒިމާ ޝަކޫރުގެ މައްޗަށް އެމްއެމްޕީއާރުސީ މައްސަލައިގައި އުފުލު ދައުވާ އަނބުރާ ގެންގޮސްފައެވެ.
އެ ހަބަރުގެ ސްކްރީނު ޝޮޓެއް ހިއްސާކުރައްވާ މަލީހު އެކްސްގައި ކުރެއްވި ޕޯސްޓެއްގައި ވިދާޅުވީ،ރައީސް މުއިއްޒުގެ ސަރުކާރުގައި ފައިސާއެއް ނެތް ކަމަށާ ހުރި ފައިސާވެސް ބޭނުން ކުރަނީ ހަމައެއް ލަމައެއް ނެތި ކަމަށެވެ. އެގޮތުން ކޮރަޕްޝަނަށް ބޮޑު ބައެއް އެބަ ހޭދަ ކުރާކަން ފާހަގަކުރައްވާ މަލީހު ވިދާޅުވެފައިވަނީ، ރައީސް މުއިއްޒަށް މާނަވީ މާބޮޑު ކަމެއް ކުރެވޭނެ ކަމަކަށް ނުފެންނަ ކަމަށެވެ.
މަލީހު މިފަދައިން ވިދާޅުވެފައިވާއިރު، އާޒިމާގެ މައްސަލަ އަނބުރާ ގެންދިޔައީ އޭނާ އެ މައްސަލަ ރިވިއުކުރުމަށް އެދި ހުށަހެޅި ހުށަހެޅުންތަކަށް ބެލުމަށް ފަހު ކަމަށް ޕީޖީއިން ހާމަކޮށްފައިވެއެވެ. ނަމަވެސް ރައީސް އަބްދުﷲ ޔާމީންގެ މައްސަލަ ރިވިއުއަށް ހުށަހެޅުމުންވެސް މި ސަރުކާރުން ވެސް ގެންނދަނީ ދައުވާތަކުގެ މައްސަލަ ކުރިއަށް ގެންދަމުންކަން ފާހަގަކޮށްލެވެއެވެ.
