މިހާރުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު މޭޔަރު ކަމުގައި އާއި ހައުސިންގ މިނިސްޓަރު ކަމުގެ މަގާމުގައި ހުރެ ހަދާފައިވާ ގޯސްތައް ބެލެންޖެހޭނެ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީޕަލްސް ނޭޝަނަލް ފްރޮންޓް އިން މިރޭ ކުރިއަށް ގެންދިޔަ ފްރޮންޓް އޮފީސް ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ މުއިއްޒު ރައީސް ކަމުގައި މިހާރު އެ ހުންނެވުމަކީ އިއްތިފާޤެއް ކަމަށާއި މޭޔަރު ކަމުގައި ހުންނެވި އިރު ކުރެއްވި ގޯސްތައް މޭޔަރުގެ މައްޗަށް އަދަބު ދެވެން ޖެހޭނެ ކަމަށެވެ.

މީގެ އިތުރުން، މި އަދަބުތައް ދޭ އިރު މި ހިނގާ ފަސް އަހަރުގެ ތެރޭގައި ހިންގާފައިވާ ޖަރީމާތައް އެޕްލައި ނުވާނެ ކަމަށާއި އެއީ ގާނޫނީ ގޮތުން އަދި ވަކި ކަމެއް ކަމަށެވެ.

މިއާއި އެކު ދިވެހި ފުލުހުންގެ އިދާރާއިން މިކަންކަން ބަލަން ޖެހޭނެ ކަމަށް ފާހަގަކޮށް ރައީސް ޔާމީން ވިދާޅުވީ ފުލުހުންގެ އިދާރާވެސް އޮތީ ކޮރަޕްޓް ވެފައިކަމަށެވެ. އެގޮތުން ފުލުހުންގެ އިދާރާގެ މަތީ ފަނޑީގެ ބޭފުޅުންތަކުގެ މައްސަލަތައް ބަލަމުންދާ މައްސަލައަށް އެމަނިކުފާނު ވަނީ ފާޑުވިދާޅުވެފައެވެ.

ގާނޫނު އަސާސީގައި ބަޔާންވެގެންވާ ގޮތުގައި އެމީހެއްގެ މަސްލަހަތު ފުށުއަރާ މީހުން މަޖިލިސް އިދާރާތަކުގައި މައްސަލަތައް ބެލުމަށް ތިބުމަކީ އިންސާފުވެރި ގޮތަކަށް މައްސަލަތައް ނިމިގެން ނުދާނެ ކަމެއް ކަމަށާއި ގާނޫނުން ފާސްކޮށް ބޮޑެތި އިދާރާތައް އުފައްދަވާފައިވާއިރު މިފަދަ މައްސަލަތައް ބެލެންޖެހޭނެ ކަމަށް ރައީސް ޔާމީން ވިދާޅުވިއެވެ.

ރައީސް މުއިއްޒު މޭޔަރުކަމުގެ ދުވަސްވަރު ހިންގާފައިވާ ކޮރަޕްޝަނާއި ޖަރީމާތަކުގެ ވާހަކަތައް އަންނަނީ ފެންމަތިވެ އެކަމަށް ބާރުދޭ ހެކިތައްވެސް އާންމުވަމުންނެވެ.