ސިއްހީ އެމާޖެންސީގެ ހާލަތްތަކުގައި ބޭނުންކުރާ އެއާ އެމްބިއުލާންސްގެ ހިދުމަތް ރާއްޖޭގައި ފުރަތަމަ ފަހަރަށް ދޭން ފަށާފައިވާ މަތިންދާބޯޓު ބަލިމީހުން ބަލާ ކޮންމެ ކޮންމެ ތަނަކަށް ނުޖެއްސޭނެތީ، ބޯޓު ނުޖެއްސޭ ތަންތަނަށް ބަލި މީހުން ބަލައި ދާނީ ކޮްން އެއްޗެއްތޯ އައްސަވާ ރައީސް އަބްދުﷲ ޔާމީން އަބްދުލްގައްޔޫމްގެ ވަރުގަަދަ ސުވާލެއް ސަރުކާރަށް އަމާޒުކުރައްވައިފިއެވެ.

އެމަނިކުފާނު މިފަދައިން ވިދާޅުވީ 20 ވަނަ ރައްޔިތުންގެ މަޖިލިސް އިންތިޚާބްގައި ޕީއެންއެފްގެ ފަރާތުން ވާދަކުރައްވާ ކެންޑިޑޭޓުންގެ ސިޔާސަތު ހާމަކުރުމަށް ބާއްވަމުން އަންނަ ޖަލްސާތަކުގެެ ތެރެއިން އާދިއްތަ ދުވަހުގެ ޖަލްސާގައި ކެންޑިޑޭޓަކާ ސުވާލު އަމާޒުކުރައްވަމުންނެވެ.

އެގޮތުން އެމަނިކުފާނު ވިދާޅުވީ ރާއްޖޭގައި އޮންނަނީ 12 ވަރަކަށް ނުވަތަ 13 ވަރަކަށް އެއާޕޯޓްކަމަށެެވެ. އެ ތަންތަނުގެ މީހުން އެކަނި ތޯ ބަލިވާނީ އައްސަވާ ރައީސް ޔާމީން ވަނީ ސުވާލު އުފައްދަވާފައެވެ.

ރައީސް ޔާމީން އިތުރަށް ވިދާޅުވީ މަތިންދާ ބޯޓެއްގައި ދަވާދު އައުކޮށް އެތެރެ ފަރުމާކޮށް އެއާ އެމްބިޔުލާންސްގެ ގޮތުގައި ބޭނުން ކުރަން ރަނގަޅުކަމަށެވެ. ނަމަވެސް ކަންބޮޑުވަނީ އެ ބޯޓަށް ހުރިހާތަނަކަށް ބަލި މީހުން ބަަލައި ލޭންޑް ނުކުރެވޭނެތީކަމަަަށްވެސް އެމަނިކުފާނު ވިދާޅުވިއެވެ.

މި ހިދުމަތީ މުޅި ރާއްޖޭގެ ހުރިހާ ރައްޔިތުންނަށް ދެވެންވާނެ ހިދުމަތަކަށްވާއިރު ރައްޔިތުންގެ ގިނަ ބަޔަކަށް އޭގެ ބޭނުން ހިފޭ ގޮތަަކަށް ސަރުކާރުން އެކަން ކުރުން މުހިންމު ކަމަށްވެސް ރައީސް ޔާމީންގެ ވާހަކައިގައި ފާހަގަކުރެއްވިއެވެ.

އެއާރ އެމްބިޔުލާންސްގެ ގޮތުގައި ބޭނުންކުރުމަށް ހެލޮކޮޕްޓަރެއް ކުއްޔަށް ހިފައިގެން ގެނެސް ބޭނުން ކުުރުން މާ ބުއްދިވެރި ކަމަށްވެސް ރައީސް ޔާމީން ވިދާޅުވިއެވެ. ހެލިކޮޕްޓަރެެއް އެއާ އެމްބިޔުލާންސްގެ ގޮތުގައި ބޭނުން ކުރުމުން އެ ހެލިކޮޕްޓަރަށް ބަލި މީހުން ބަަލައި ކޮންމެ ރަށެއްގައިވެސް އޮންނަ ބޯޅަ ދަނޑަށް ޖެއްސޭނެކަމަށްވެސް އެމަނިކުފާނު ވިދާޅުވިއެވެ.

އެއާ އެމްބިޔުލާންސްގެ ހިދުމަތް ދޭން ރާއްޖޭގައި ފެއްޓުމަކީ އުފާވެރި ޚަބަރެއް ނަމަވެސް ރާއްޖޭގެ ބޮޑުބައި އެކަމުން މަހުރޫމްވާތީ ކަންބޮޑުވާކަމަށްވެސް ރައީސް ޔާމީން ވަނީ ފާހަގަކުރައްވާފައެވެ.