ސަރުކާރު މައި ހޮސްޕިޓަލު ކަމުގައިވާ އައިޖީއެމްއެޗުން ތަކެތި ހުސްވެ މުހިއްމު ޓެސްޓުތައް ނުހެދޭތީ ކުއްލި މައްސަލައެއް މަޖިލީހަށް ހުށަހަޅައިފިއެވެ.

ޓެސްޓުތަކެއް ނުހެދިގެން އުޅޭ މައްސަލަ މަޖިލީހަށް ހުށަހެޅުއްވީ މާވަށު ދާއިރާގެ އެމްޑީޕީގެ މެމްބަރު އަހްމަދު ޝާކިރެވެ.

މިކަމަށް އެދި ރައްޔިތުންގެ މަޖިލީހުގެ ރައީސް އަބްދުއްރަހީމަށް މެމްބަރު ޝާކިރު ފޮނުއްވި ސިޓީއެއްގައި ބުނެފައިވަނީ، އުމުރުން 18 އަހަރުގެ ނަފްސާނީ ބައްޔެއް ތަހައްމަލު ކުރަމުންދާ ކުއްޖަކަށް ކޮންމެހެން ހަދަންޖެހޭ ޓެސްޓުތައް އައިޖީއެމްއެޗުން ނުހެދޭނެކަން އަންގާފައިވާ ކަމަށެވެ.

ހަމައެހެންމެ އައިޖީއެމްއެޗުން އެކަން އަންގާފައިވަނީ އެ ކުއްޖާއަށް ފަރުވާއެއް ފެށުމުގެ ކުރިން ހަދަންޖެހޭ ޓެސްޓުތައް ހެދޭތޯ ޔަގީންކުރުމަށްފަހު، އެ ފަރުވާގެ ޓެސްޓު ހެދުމަށް ނަންބަރު ނަގައި، 200 އަށް ވުރެ ގިނަ މީހުންގެ ކިޔޫއަކަށް ފަހު ލޭ ނަގަން ދިޔަ ވަގުތު ކަމަށް ސިޓީގައި ވަނީ ބުނެފައެވެ.

އެ ސިޓީގައި ވާގޮތުން މިވަގުތު އައިޖީއެމްއެޗްގެ ލެބޯޓަރީގައި ލިތިއަމް ޓެސްޓް ހެދުމަށް ބޭނުންވާ ރީއޭޖެންޓެއް ނެތެވެ. މީގެ އިތުރުން، ޕެޓްރިޑިޝް އާއި ސްޓްރޯކް ޖެހޭ ބަލި މީހުންގެ ލޭ ދިޔާކުރުމަށް ބޭނުންވާ މުހިންމު ބޭސްވެސް ރާއްޖޭގައި ނެތް ކަމަށް ޝާކިރުގެ ސިޓީގައި ފާހަގަކުރައްވާފައިވެއެވެ.

އެހެންކަމުން އެމައްސަލަ މަޖިލީހުގެ ކޮމިޓީން އިތުރަށް ބައްލަވައި އައިޖީއެމްއެޗްގެ ވެރިންގެ ކިބައިން އެކަމުުގެ މަޢުލޫމާތު ހޯއްދެވުމަށް ޝާކިރުގެ ސިޓީގައި ވަނީ އެދިލައްވާފައެވެ.

ރައްޔިތުންގެ އަސާސީ ހައްގަކާ ގުޅުން ހުރި މިފަދަ މައްސަަލައެއް ހުށަހަޅާފައިވާއިރު ހަމަ އެފަދަ އަސާސީ ހައްގުތަކާ ގުޅުން ހުރި ކުއްލި މައްސަލަތަކެއް ދާދި ފަހުން މަޖިލީހަށް ހުށަހެޅުމުން ވެސް ސަރުކާރު ތަމްސީލުކުރާ ޕީއެންސީގެ މެޖޯރިޓީ އޮތް މަޖިލީހުން ވަނީ ބޭރުކޮށްލާފައެވެ.

އެގޮތުން އާސަންދައިގެ ދަށުން އަސާސީ ބޭސް ވެސް ނުލިބޭތީ އާ ފުވައްމުލަކު ސިޓީ ރައްޔިތުންނަށް ސާފު ފެން ނުލިބޭ މައްސަލައިގައި ހުށަހެޅި ކުއްލި މައްސަލަވެސް މަޖިލީހުން ވަނީ ބޭރުކޮށްލާފައިކަން ފާހަގަކޮށްލެވެއެވެ.